Zweibrücken Do bische platt: Glocke ware schunn immer e Thema fer die Poete
Die Kercheglocke hann in meim Lebe e großie Roll gespielt. Desweje hat’s mich gefreit, dass es Glockehandwerk jetzat bei uns zum Kuldurerbe gehört. Fer mich vor allem zur Erinnerungskuldur: Wann ich am Sunndaa die Glocke von unsere große Stadtkerche hör, de Alexanderskerch un Heilisch Kreiz, werd’s mer ganz heemelich, awwer ah e bissje weh um’s Herz. In de Silveschdernacht zum erschde Friedensjohr 1946 hat’s e Glockewunner gebb. Obwohl Heilisch Kreiz bloß noch e Ruin war, un mer net zu de Glocke drowwe uff’m Turm gekennt hat, hann die Glocke all um Mitternacht es neie Johr ingelait. Es war net de Heilisch Gescht, der se hat schwinge losse, sonnern de Patt Erb un sei Freinde vun de Kadolisch Juchend, die sich in de dunkel Nacht getraut hann. Als Lauser hab ich e paar Johr schbäder die abgehängte Glocke neewe de Behelfskerch am Schwarzbach zamme mit meim Freind Achim selbert heemlich gelait – die Geschicht hab ich eich schunn vezählt. Wie ich in de Alexanderskerch konfermiert worr bin, hann dort die Glocke es erschde Mol widder nohm Kriesch gelait.
In die Glockegass bin ich als Lauser oft zu de Frau Grund gang die Milch im Kännche hole. Domols hab ih nadierlich noch net gewisst, dass die Gass ihr Name vun de Glockegießerei Couturier hat, die dort deheem war. Im 18. un 19. Johrhuunert war de Glockeguss in unsrer Stadt schwer in Mode: Nebem Vadder un de Söhn Couturier hann vor allem die Familie Gachot un Lindemann die Tradition vun de Glockemeeschder begrind. De Johann Friedrich Lindemann war im ganze Land bekannt un hat sogar e Glock fer de Speyrer Dom gegoss. An ihn un die große Zweebricker Glockezeit erinnert heit e Glöckche im Erdgeschoss vum Mannlichhaus: Dort steht die Glock, die de Johann Friedrich fer die Dellfelder Kerch gegoss hat.
Weiter lesen
Die Zweibrücker Kirchen spielen in den Kolumnen von Wolfgang Ohler immer wieder eine Rolle.
In der Alexanderskirche ist er konfirmiert worden und bekam vom Dekan eine Ohrfeige verpasst. Vom Krankenhauszimmer aus hatte er die drei Kirchtürme der Stadt im Blick – und mittags um 12 Uhr gab es „schönen Radau“.
Die Glocke ware schunn immer e Thema fer die Poete. In de Schul hammer’s „Lied von der Glocke“ vum Schiller geles: „Fest gemauert in der Erden/Steht die Form aus Lehm gebrannt“, un so weider. Em Schiller sei’m Freind, em Goethe, hat des kee Ruh geloss, un er at ah e Glockegedicht geschribb: die wandelnde Glocke. Dodemit hat er abber schwer neebes Neschd geleet: „Die Mutter hat gefackelt (...), die Glocke kam gewackelt“, heeßt’s do. Also des klingt so garnet noh Dichderferschd un die Ballad gefallt mer heit noch net. Ich vemut, dass des de Johann Wolfgang gedicht hat, nohdem er mit seine Kumpane, em Schiller un’m Jean Paul in ihrer Stammkneip in Weimar e paar Feierowendschöppcher zu viel gedrunk gehat hat. Aller, mer is halt net immer in Hochform, ah e Dichderferschd net.
So, jetzder isses grad Sunndaamorje, un ich geh naus uff de Balkon un hör mer die Glocke an, die vun Auerbach, vun Heilisch Kreiz un de Alexanderskerch. Un weil ich mich net entscheide kann, bleib ich halt deheem.