Ich mään jo blooß Schunn widder: Die CDU im Panik-Modus
Es gebt Phase, so ganz grob zwische emme Johr vor enre Landdaachswahl bis uug’fehr e paar Monat vor enre Landdaachswahl, do traut mer de CDU in Rheinland-Palz absolut zu, dass se diesmol im Wahlkampf alles richdich macht. Mer glaabt dann sogar, dass die Schwarze es hiegriechen kinnten, nooch – Moment, ich rechen des sicherheitshalwer no chemol aus – nooch 35 Johr emol widder e Landdaachswahl geche die SPD zu gewinne. In dere Phase basst bei de CDU im Brinzibb erscht emol alles: Mer hot en Spitzekandidat odder e Spitzekandidatin, wann ach oft aus’m Nix, mer hot e paar Theme ausgemacht, wu die SPD/die Ampel konsequent verbockt, mer strahlt Lockerheit aus. Un es CDU-Mantra hääßt: Mir lossen uns vun unserm Vorsprung in de Umfrooche zu nix verleite – un heckewelsch mache losse mer uns schunn gar nit.
Dann kummt die Phase, wu mer jetzt sinn: e paar Woche vor de Wahl. Un bei de CDU brecht – uuweicherlich un quasi aus heiterem Himmel – nackti Panik aus. Es langt ää Umfrooch, wu die SPD e bissel uffholt, schunn schmeißt die CDU Rheinland-Palz des iwwer de Haufe, was se in de Umfrooche stark gemacht hot.
2026 sieht des dann so aus: Wu noch vor Woche in emme CDU-Themewahlkampf en CDU-Spitzekandidat uffgebaut worre isch, geht’s uff äämol, wie’s scheint, blooß noch um die Angscht vor Rot-Rot-Grün. Es geht nimmi ums Konzept vun de CDU odder um ihrn Kandidat, sondern um die Ideeje vun de – bis dato im Land komplett irrelevante – Linksbaddei. CDU-Wahlkampfredde un CDU-Indernettpouschts zeichnen Bilder vun Rheinland-Palz (ich iwwertreib blooß en Hauch), wu Baure un Winzer ihr Land mit Hammer un Sichel bestellen, wu die BASF verstaatlicht werd un wu die Kinner in de erschte Stunn vun de Schul stramm stehen un die Internationale singen.
Ich will jo gar nit in Abredd stelle, dass mer sich bei de CDU werklich Sorche macht, was alles bassiere kann mit unserm Land, wann die SPD schunn widder gewinnt. Mir wär’s awwer fer de bollidische Wettstreit bis zum 22. März schunn e bissel liewer, die CDU deet mir zeiche, dass se selwer noch an ihrn Siech glaabt. Ich mään jo blooß.
Der Autor
Michael Konrad ist bei der RHEINPFALZ am SONNTAG der Mann für die Pfalz und alles Pfälzische. Mit seiner wöchentlichen Dialektkolumne „Ich mään jo blooß“ und der Mitmachserie „Saach blooß“ über Pfälzer Begriffe und Redensarten schafft er Raum für die Sprache der Pfälzerinnen und Pfälzer. Die Leser können ihn damit immer wieder auch „live“ erleben – überall in der Pfalz. Seine Bücher rund um den Pfälzer Dialekt gibt’s unter anderem in Pfalzläden, im Buchhandel und im RHEINPFALZ-Shop.