Ich mään jo blooß 
De Dschonni un die verlorene Seeletreeschter
Bis jetzt bassiert: Nix. Außer, dass de Privatdetektiv Dschonni Rapunzel, de allerbeschte Schnüffler vun de Palz mit allerdings ach de allerwenigschde Kliente, wach worre isch mit emme kolossal dicke Kopp. Uff de Kautsch gepennt. Im Birro. Jemand reißt die Dier uff.
„Sie sinn de Dschonni Rapunzel.“
Mei B’sucherin froocht nit, sie stellt fescht. Sie formt debei jedes Wort, als wär’s die Hinnerlossenschaft vun emme deitsche Schäferhund, die se in en Plaschdiggbeitel steckt. Sie guckt mich ach so aa.
Ich lins verstohle uff mei Magnum Nr. zwää. 1,5 Liter Schbeedburgunder. Leer. Un mir fallen ach sunnscht all mei Sinde ei. Hinner meine B’sucherin fallt die Dier so lautlos ins Schloss, wie des mechanisch gar nit meechlich isch. Sogar die Scharniere hänn also Muffe vor dem, was sich do grad abspielt. Die Fraa neschtelt jetzt ach noch an ihre Handdasch. Ich nemm mei Magnum Nr. äns in de Blick, Kaliwer .357, Smith & Wesson. Brauch ich den Revolver? Jetzt? In meim eichene Birro?
„W-wollen Se sich nit setze?“, saach ich un zeich uff mein Klientesessel. Mei B’sucherin macht e G’sicht wie e verkrumpelti Zeitungsseit, bevor mer se im Grill unners Aamachhelzel schiebt. Sie bleibt stehe.
„Sie sinn also der Privatdetektiv, wu immer blooß babbelt un nie ebbes schafft.“
Widder kä Frooch. Ich zwinker so souverän, wie’s halt geht, wammer middem annere Aach sein Zigarreknipser sucht.
„Wann Sie des saachen“, saach ich.
Wu isch iwwerhaupt es Kischtel mit meine Coronas Especiales? Mei Seeletreeschter. Die steht doch immer do. Ich griech de kalte Schwääß.
„Der iwwer de allerklännschte Forz die greeschte Heldeg’schichte verzappt.“
„De Dschonni Rapunzel hot noch jeden Fall geleest!“
Ich schieb die Lipp vor un nick mir selwer zu. Manschmol helft’s.
Alle Fäll geleest. Uff jeden Fall! Blooß nit den vun dem Detektiv, wu aafangt, vun sich selwer in de dritte Person zu verzehle.
...
Was isch jetzt? Griecht de Dschonni die Kurv? Was hot die B’sucherin im Sinn? Un wu, e Gewitter, Feier, Dunnerkeil!, sinn em Dschonni sei saudeire kubanische Stumpe? – Fortsetzung folscht. Ich mään jo blooß.
Hier finden Sie „Dääl 1“ des Falls sowie die Kolumnen aus früheren Ausgaben.
Der Autor
Michael Konrad ist bei der RHEINPFALZ am SONNTAG der Mann für die Pfalz und alles Pfälzische. Mit seiner wöchentlichen Dialektkolumne „Ich mään jo blooß“ und der Mitmachserie „Saach blooß“ über Pfälzer Begriffe und Redensarten schafft er Raum für die Sprache der Pfälzerinnen und Pfälzer. Die Leser können ihn damit immer wieder auch „live“ erleben – überall in der Pfalz. Seine Bücher rund um den Pfälzer Dialekt gibt’s unter anderem in Pfalzläden, im Buchhandel und im RHEINPFALZ-Shop.