ZWEIBRÜCKEN Zweibrücker Mundart: Wesweje de Elon Musk net in Zweebricke baue wollt

Ihr hann ledschd Johr bestimmt in de Zeidung geles, dass unser Städtche mit Berlin im Wettbewerb um die Ansiedlung vun enner Fabrik fer Elektroaudos gewest is un knapp es Nohsiehn gehat hat. Jetzat kenne mer uns revanchiere un als eschder dorchs Ziel gehe. Des neie Wettrenne heeßt: Wer is schneller ferdisch, de Berliner Fluchhafe odder unser Bootsveleih drunne an de Schließ. Es werd widder arisch knapp ausgehe, weil die Berliner im Oktober eröffne wolle, unser Bootsveleih schunn im Summer – wann’s guudgeht. Des Ungewisse is es Johr: Kenner will sich uff 2020 feschdleje. Fer unser Bootcher stehe die Wette awwer ginschdisch, weil jetzat es Roode Kreiz dehinner is, un die sinn jo Spezialischde fer Notfäll un Herzstillständ.

Mer muss sich werklich frooe, was dann so schwiersch dran sinn soll, denne Bootssteech uff Vordermann se bringe. Er sieht gaanet iwwel aus, un mer kennt menne, des is bloß e Ausredd, dass er’s nimmie duud. Un 15 000 Euro soll die Reparadur koschde! Mei liewer Schollie, do kennt mer werklich e klenner Yachthafe defor baue, wie de Hans Prager gemennt hat. Unser Owwerbojemeeschder hat sich serick gehall un gesaat, er kennt kee „belaschbarie Aussaach“ zu denne Bootcher mache. Wischdicher is jo, dass der Steech ball widder belaschbar is, gell. E paar Dutzend Endcher halt er jedenfalls aus. Hoffentlich kommt kenner uff die Idee, e bautechnisches Guudachde insehole, do dääde die 15 000 Euro net lange.

E Stadt am Wasser ohne Bootcher is halt kee Sach. Angeblich war des ah de Grund wesweje der Elon Musk, des is der mit de Elekdroaudos, net noh Zweebricke gewollt hat: „No boats, no factory!“ (Kee Bootcher, kee Fabrik), soll er gesaat hann. Ich weeß gaanet, wie lang des Theater um denne Bootsveleih schunn geht. Im Johr 2013 bin ich mit unserm Enkelche Nova aus Berlin es ledschde Mol uff’m Schwarzbach im Tretboot rumgeschippert. Do hannse die Eröffnung vum Berliner Fluchplatz grad es erschde Mol veschob gehat. Alle Johr hat’s Novache dann gefroot, wann mer widder Bootche fahre kenne, un ich hab’s uff’'s nächschde Johr vetröscht. Jetzat heeßt’s, die alde Tretboote hätte inzwische im Schuppe de Geischd uffgebb. Kann ich mer net vorstelle, weil die Dinger aus Eise sinn. Ich glaab eher, dass mer se noh der lang Zeit nimmie find. Ei es Roode Kreiz hat doch fer so e Fall Suchhunde, die bei Kadastrophe ingesetzt werre; vielleicht hann die Glick.

Mir zwee, es Novache un ich, gebbe jedenfalls die Hoffnung net uff, dass eenes Daas die Schwarzbachflott widder in See steche kann. Dann wünsch ich mer e Stapellauf mit em belaschdbare OB, de Rosekönischin un unserm Marinechor. Un wann bis dohin de Berliner Fluchplatz noch immer net ferdisch is, lade mer denne ihr OB ah in.