Zweibrücken Zweibrücker Mundart: Ohne Antenn daucht so e Aluhut nix

Mir siehe uns nur noch selten, de Paul un ich, wejem Corona, un desweje hab ich mich gefreet, wie er mich ledschd Woch angeruf un mer e guuder Rutsch gewinscht hat. Ich hab glei gemerkt, dass er noch was uff’m Herz hat. Alla, Paul, hab ich gesaat, wo drickt de Schuh?

Bass uff, hat er gemennt, ihr hann doch ah im neije Johr die gelb Tonn fer de Plasdikmüll kriet. Ei jo, Paul, hab ich gesaat, un ah so e Broschür, in der drin steht, was in die gelb Tonn alles enin gehört un was net. Genau des isses, hat de Paul gesaat. Awwer do steht nix drin, ob de ah e Aluhut in die gelb Tonn schmeiße derfsch, odder ob der zum Restmüll gehört odder weje denne Strahle sogar Sondermüll is. Kannsch du mer do helfe?

Ich hab gedenkt, ich trau meine Ohre net un war e Moment lang todal baff. E Aluhut, hab ich dann gefroot, ei wie kommsch dann du zu em Aluhut, Paul? Sowas ziehe doch bloß die Verschwörungsdeppe uff de Kopp. Ei bass uff, hat er mer zur Antwort gebb, des is e langie Geschicht. Un dann hat er mer’s vezählt.

Zum Runeyoga in de Volkshochschul

Em Mona sei beschdie Freindin, es Gabi, hät doch Hutmacherin gelernt. Un die zwee hätte sich bei de Frau Schneimann vun de Volkshochschul zum Runeyoga angemeld. Do dääde sich die Fraue ee mol in de Woch treffe un ihr Runeyogaübunge mache. Im Freie uff enner Wies un mit Abstand, weje dem Corona. Un dodebei missd jedie e Aluhütche uffziehe, weje de schädliche Gedankestrahle vun de Merkel un ihrm Gesundheitsmister, em Bill.

De Spahn is de Gates unn de Gates is de Spahn

Moment, Paul, hab ich ne unnerbroch, der heeßt net Bill, sonnern Jens. Des is de Jens Spahn. Ich weeß, hat er ganz kleenlaut gesaat, awwer die Frau Schneimann behaupt, dass des een un dieselbe Person wär, de Bill Gates un de Jens Spahn. Awwer jetzat hör zu: Weil des Gabi jo gelernte Hutmacherin is, hat’s fer jede Teilnehmerin am Kurs aus Staniol e floddes Aluhütche geschneidert, des hat ne all guud gefall. Glei in de erschd Stunn hat die Frau Schneimann awwer gemeckert, die Hütcher dääde nix dauche, do dääd jo die Antenn fehle. Do war’s Gabi beleidischt, hat sei Hütcher ingesammelt un is mit de Mona ab dorch die Mitt. Un jetzat leije die Hütcher all bei uns rum.

Ei Paul, hab ich ne in de Senkel gestellt, sinn ihr zwee dann noch ganz bei Troschd! Wie kammer dann so e Unfuch mitmache! Aluhütcher geje de Merkel ihr Gedanke! Jo, du hasch recht, hat er gemennt, awwer jetzat weeß ich noch immer net: Gehöre die Aludinger in die gelb Tonn odder net?