Zweibrücken Zweibrücker Mundart: Es Mona dääd gern de Paul noch im Februar heirate

Wie mer neilich widder beim Bruno an de Thek gehockt hann, dort wo mer immer hocke, wann mer unser Feierowendschöppche trinke, hat de Paul ganz dief geseifzt un e Schnuut gezoo. Alla hopp, Paul, hab ich ne gestubbt, vezähl, wellie Laus is der dann heit iwwer die Lewwer gekrawwelt. Ach je, hat er noch diefer geseifzt, froo net! Awwer dann hat er’s halt doch vezählt.

Des muss mer doch net leichtferdisch uff’s Spiel setze

Sei Mona dääd’m kee Ruh meh losse un andauernd vum Heirade anfange, vun de Frieh bis in die Nacht. Er hätt jo nix degeje, wann’s heirate wollt, awwer doch net ausgerechnt ihn. Ei Paul, hat de Bruno, unser Wert, gemennt, ihr sinn doch jetzat schunn Sticker zeh Johr velobt, wann’s langt. Ei des isses jo, hat de Paul gescholl: Was so lang andauert un guud geht, des muss mer doch net leichtferdisch uff’s Spiel setze, saa ich meim Monaschätzje. Awwer nee, es hat sich in de Kopp gesetzt, dass mer denne Monat noch minanner uff’s Standesamt gehn. Ei warum dann ausgerechnet jetzat im Februar, hab ich wisse wolle, des is werklich kee Wonnemonat. Weje dem Datum, hat er gesaat, am 20. 2. 2020 soll’s bassiere, mennt’s Mona. Des wär e Glickszahl, weil die Zwee e glickliches Pärche bedeide dääd, un die Null dääd fer null Sorje stehn. De Bruno hat sich am Kopp gekratzt: Also do wär mir de 29. Februar lieber, des hätt de Vordeel, dass de bloß alle Schaltjohr an dei Hochzeitsdaa denke musch. Uff Zahle gebb ich gaanix, hat de Paul de Kopp geschiddelt. Du willsch saan: Uff Zahle un uff’s Bezahle, hat do de Bruno geknewwert, dei Zech vun ledschder Woch steht noch offe, gell. Do hat de Paul dabber uff die anner Seit geguckt.

De Volkstrauerdaa kommt ah net in Betracht

Bass uff, Paul, hab ich gesaat, du musch e Gejevorschlach mache, der dei Monache iwwerzeicht. Hab ich alles vesucht, hat er geseifzt, un de 1. April vorgeschlaa. Do hättsche mei Schätzje mol kreische höre solle. Alla, dann kommt ah de Volkstrauerdaa net in Betracht, awwer wie wär’s mit Halloween? hat de Bruno vorgeschlaa. Ich glaab, dich hat’s, hat de Paul gescholl, do kann ich mer glei de Strick gewwe. Un de 28. Auguschd 2034, hab ich gefroot, do is bei uns die nächschd Sunnefinschdernis.

De Bruno hat geheirat wie de Jingschde in die Schul komm is

Mei ledschder Vorschlaach war, er soll mol ins Horoskop gucke, ob er do net e besunnersch ginschdisches Dadum find, des noch weit in de Zukunft leit. Odder halt e anneres Jubiläum, hat de Bruno gemennt, mei Fienche un ich, mir hann geheirat, wie unser Jingschder in die Schul komm is. Endlich hanner mol e guudie Idee, hat do de Paul gestrahlt, des isses: de 14. April 2050, do hat die Schwiechermudder hunnerdschder Gebordsdaa!