Zweibrücken Zweibrücker Mundart: De ganze Ehrbusch war unser Reich

Unser Hündche, es Romi, war frieher in Rumänie, wo’s herkommt, e Stadtstreuner. Vielleicht is des de Grund, wesweje des Dierche so gere in de Wald laafd. Alla, mir losse’m sei Wille, weil mir jo selbert gern hingehe, in unser scheener Wald. Mir hann jo net weit: die Storjestrooß enuff, iwwer de Storjesteech, links ab zum Holzgaade, un schunn simmer im Fasaneriewald. Dort werd’s Romiche zum Jachdhund, schnuppert und sucht, scherrt und bellt.

Des war unser Wald, seit ich denke kann. Ich hab kaum laafe gekennt, do bin ich jede Sunndaa an de Hand vun meine Eldere in die Fasanerie spaziert. Fer mei korze Been war des e weider Weesch un de Wald mit seine Bääm hat mich net indressiert, mit enner Ausnahm: Korz vor de Fasaneriemauer hann Betonbrocke vun em gesprengde Bunker zwische de Bääm gelee. Do hat mer mei Vadder dann vum Kriesch vezähle misse. Anschließend hann mir zwee aus vollem Hals gesung:

Im Wald, do sinn die Ra-hai-wer, halli hallo die Ra-hai-wer, die mache unser Schwiechermudder kald.

Dodriwwer hammer laut lache misse, un mei Muddie hat de Kopp geschiddelt. Die weit Streck hat mer desweje nix ausgemacht, weil ich am Enn mei ganz persönliches Wertschaftswunner erlebt hab: es Restaurationsbrood im Biergaade vun Weisensteins Wertschaft. Fer mich war des Brot mit Schinke un Worschd un Käs un Eier un Gurke un mit noch meh Worschd es achde Weltwunner.

E paar Johr späder sinn mir Lauser im Winder mi’m Schliede in de Ehrbusch un erschd widder heem, wann’s duschder worr is un uns sämtliche Finger un Zeewe abgefror ware. Domols ware die Winder richdische Eiszeide. Dodriwwer hab ich ledschd Woch geschribb. De Wald, des war unser Reich, do hammer uns ausgekennt wie im Gaade hinnerm Haus.

Nochmols e paar Johr späder simmer am Wannerdaa, wann unserm Lehrer nix anneres ingefall is, naus in die Fasanerie un weider zu de Cuntwicher Hütt gestiwwelt. Alla, immer noch besser als wie Algebra un Chemie. Do hab ich dann zum erschde Mol die Geschicht vun Tschifflik un vum Polekönisch Stanislaus gehört, un mir hann am annere Daa e Aufsatz driwwer schreibe misse.

Heit weeß ich noch e bissje meh un gehör zu denne, die sich defor insetze, dass uns die historisch Fasanerie erhall bleibt. Un wann ich mit unserm Hund dorch de Wald stromer, dann vezähl ich’m als, dass die Burschruin gejeiwwer vum ehemalische Bahnhof Tschifflik aus’m Middelalder stammt, dass es schunn im 16. Johrhunnerd im Ehrbusch e Viehhof gebb hat mit Brunne un Forelleweiher, was de Name Tschifflik se bedeide hat, un dass die Fasaneriemauer vum Herzoch Christian gebaut worr is. Es Romi schbitzt dann als die Ohre un wedelt indressiert mi’m Schwanz.