Zweibrücker Mundart Wie ich emol mei Schreiner e bissje angeloo hab

Es heeßt jo, mir Mensche wäre frieher all mol Jäscher un Sammler gewest, un des wäre mer ah heitsedaas noch. Die een Kadegorie hann se dodebei vegess: Des sinn die, die de annere beim Jaache un Sammle zugucke, awwer selbert nix duun. Vun de Jächer sinn vor allem die Scherzejächer iwwrisch geblibb. Sammler gebt’s degeje noch e ganzie Meng.

Do hat zum Beispiel in de RHEINPFALZ gestann, dass e Rentner aus Köln e Sammlung vun 4000 Deko-Schweincher hat, die er gern los wär, weil sei Wohnung weje der groß Schweinerei langsam se kleen werd. Un wann ich mer die Kaufgesuche im wöchentliche Marktplatz do in de Zeidung anguck, do kann ich mich bloß wunnere, was alles gesammld werd: vor allem alder Milidärkram, net bloß die Orde, sonnern ah Stahlhelme, Uniforme, Dolche un Panzer; dann nadierlich Briefmarke, alde Radios, Musikinschdrumende, Boppe, alde Schallpladde un Uhre, Modelleisebahne un Schukoaudos, Starfoddos un Blechspielzeich, es gebt nix, was net gesucht un gesammelt werd.

Als Kind nadierlich Briefmarke gesammelt

Aller, ich bin do kee Ausnahm. Als Kind hab ich nadierlich ah Briefmarke gesammelt un mit meine Freinde gedauscht. Die Fenschderbank im Treppehaus war die Tauschbörs, do hammer gefuggert un gehannelt uff Deiwel komm raus. Dann nadierlich die Fußballerbildcher, die’s fer Kaugummi un Schuhwichs gebb hat. Die Oma hat ihr Knoppschachdel gehat mit dausend bunde Knöpp drin, mit denne ich hab schbiele derfe. Mei Muddie hat vun mir zum Gebordsdaa als e Sammeltass geschenkt kriet un in de Schrank mi’m gude Gescherr gestellt. Ich selbert hab mer zu jeder Geleechenheit e Karl-May-Buch gewinscht, nix anneres, un heit stehe in meim Biecherschrank genau 51 Bänd. Dezu komme noch zwee Sammelalbe mit Bilder, die’s zu de Sanella gebb hat. Insgesamt hann sich in de Johre e paar dausend Biecher angesammelt un decke zwee Wänd im Wohnzimmer zu. Wie mer dodefor unser Schreiner e Biecherregal gebaut hat un demit ferdisch war, hat er de Kopp geschiddelt: Die do Biecher hann Sie awwer net all geles! Ich hab e bissje geloo un gesaat: Awwer sicher, die meerschde sogar zweemol.

In enner Eck steht e Turm aus sibbe alde Schreibmaschine, wer die abstaabe muss! Abber mei allerliebshde Sammlung, des sinn e dutzend Plasdikfigiercher, Cowboys un Indianer, de schmale Reschd aus meiner Kindheit, wo ich Schdicker achzisch vun dere Sort gehat un schdunnelang demit geschbielt hab. Wie ich defor se ald war un mit ganz annere Figure gespielt hab, sinn die Kerlcher zu de Kinner in die nah un fern Vewannschaft ausgewannert. Bloß die zwee Hännvoll hann sich gud veschdeckelt un sinn irschendwann widder uffgetaucht. Un wann nimmande in de Näh is, nemm ich se vum Regal un schbiel heemlich e bissje demit; gell, net weider saan!