Mundartkolumne: Do bische platt So mache als ob is awei scheint’s modern
Ich hab erschd gedenkt, des wär de Startschuss in die närrisch Zeit, was ich do in de Zeidung geles hab: Do schbaziere Leit mit Hundelein un Hundehalsband, abber ohne Hund dorch die Geeschend. Wie ich’s de Romi, des is mei Hundche, vezählt hab, hat die bloß de Kopp geschiddelt un die Ohre angeleet.
Hobby-Dogging dääd des heeße, un dodemit soll mer sich an de Hund gewöhne, bevor mer enner hat. Mer dääd so lerne, sich hundgerecht se vehalle un sich uff die Veantwortung vun em Hundehalder vorsebereite. Ob die dann ah schunn probeweis Hundesteier bezahle? Ei so e Hobby-Dogger hat zwar kee Hund, awwer e Vochel. Un wahrscheinlich wisse die Ohnehundehalder ganet, dass Dogging bisher was ganz anneres bedeit: sich in de Öffentlichkeit unsittlich benemme. Abber dodruff kommt’s jetzat ah nimmie an.
Die Hobby-Dogger hann e Vorbild, des is es Hobby-Horsing: Do klemme sich Reider ohne Gaul e Steckeperd zwische die Been un hoppele los, hobbse iwwer Hinnernisse un veanstalde Turniere, alles ohne Saddel un ohne Perd. De Vordeel: Mer braucht kee Stall, un so e Steckeperd fresst ah kee Hawwer.
Wahrscheinlich is des jetzat de neischde Trend: Mer duud’s nimmie werklich, sonnern macht bloß so. Als nächschdes kommt dann es Radfahre ohne Fahrrad dran, es Phantom-Biking: Mer rennt ohne Rad erum mit enner Klingel am linke Daume un klingelt demit. Odder es Ohne-Wasser-Schwimme: In de Badehos rennt mer uff’m Druckene un krault debei mit de Arme dorch die Luft. Odder mer geht als Gernegroß mit em Holzgewehr uff die Jachd, un wann em e Hirsch odder Wildsau iwwer de Weesch laaft, ruft mer: Peng, du bisch dood.
Ich hab iwwerleet, ob des alles Anzeiche vum bevorstehende Weltunnergang sinn. Ich denk awwer, es is eher so e Art Roll rickwärts in unsrer Zivilisation, e Proteschd geje die Digitalisierung vun unserm ganze Lebe. Mir wolle widder serick in unser Kindheit, wo alles noch analoch, enfach un iwwerschaubar war. Kenne ner eich erinnere, wie mir frieher als Kinner gespielt hann? Zum Beispiel Cowboy un Indianer: Mir hann kee Perd un kee Gewehr gebraucht un sinn iwwer die Prärie geritt, hann geschoss un gekämpft un geruf: Peng du bisch dood!
Merke ner was? Unser Lewe war e großes Spiel, un mir ware debei glicklich un sefriede ganz ohne Requisidde, ohne Gaul un Schießgewehr. Un dorthin wolle mer widder serick mit dem Dogging un Horsing un Bleedsing, serick in unser Kindheit, wo unser Fantasie es Perd, de Hund un grad alles ersetzt hat. Die Dogger un Horser wolle nix anneres als wie spiele un Spaß hann un widder Kinner sinn. Aller, wann des so is, spiele mer jetzat all minanner Vestecke un Fang. Un an de Weihnachde winsch ich mer e Steckeperd.