Zweibrücken Mundart: In de Weltgeschichd winmmelt’s nur so vun Halbstarke

Also so was: Jetzat soll nohm Nadur- un Dierschutz ah de Kinnerschutz ins Grundgesetz. Die Reijefolsch saat schunn alles. Wahrscheinlich werd„s vor de nächschde Wahle nix demit, weil de fer e Grundgesetzännerung e Zweedriddelmehrheit im Bundestaach brauchsch, un die Opposition is geje de Reschierungsvorschlach, weil der ne net weit genuch geht. Des is polidischie Logik: Weil mer noch meh Kinnerrechde will, werd„s im Grundgesetz gaa kenne gebbe.

Ich hab widder an de Napoleon denke misse. Der hat gemennt, er dääd net als de Siescher in seine viele Schlachde in die Geschichd ingehe, sonnern als Gesetzgeber. Un er hat Recht behall: Kee Mensch redd meh iwwer Jena un Auerstätt, awwer de Code Napoleon is heit noch wischdisch, weil domit de Grundsteen fer unser Bürgerliches Gesetzbuch geleet worr is.

Was hat des jetzat mit de Kinnergrundrechde se duun, werre ihr froon. Ei bassen uff: Dem Napoleon sei Code Civil war es erschde Gesetz, in dem iwwerhaupt vun de Kinnerscher die Redd is. Bis dohin ware se klenne Erwachsene un sinn ah so behanneld worr. Ei in de ganz Weltgeschichd wimmelt„s bloß so vun Friehreife un Halbstarke. De Vochel abgeschoss hat de Ludwich das Kind, denne se so genennt hann, weil er mit sechs zum Frankekönisch gekrönt worr is. De Alexander de Große hat mit neinzeh die Welt erobert un war es Vorbild fer de Karl XII., der schunn im Alder vun fuffzeh Herzoch vun Zweebricke un neeweher Könisch vun Schwede war. Die Dochder vun seim Schbezi Stanislaus, es Marieche, hat de französische Könisch Louis gefreit, wie der ah grad fuffzeh war. Un e paar Johr schbäder is unser Christian uff de Herzochthron gegrawwelt, do war er dreizeh un hat noch mit seim Cousin im Gaade hinnerm Schloss Veschdeck gespielt. Aller, es Karolin, sei Muddi, hat in de erschde Zeit die herzogliche Geschäfde erledischt, awwer kaum achzeh hat de Krischan selbert es Reschiment gehat.

Un was fer die Ferschde gegoll hat, des is de Kinnercher aus„m Volk uff e annerie Art net erspart geblibb: Sie hann schunn als klenne Krutze hart schaffe misse, sinn jung veheirat worr, als Kinnersoldade in de Kriesch gezoo un im Kerker geland, wann se sich degeje gewehrt hann. Erschd de Napoleon mit seim Gesetz hat do de Kinner Rechde velieh, se in die Schul geschickt un ah sunsch so e Art rechtlicher Schutzraum fer se ingericht. Aller, de Vadder hat se nioch vedrimme un e paar Woche insperre losse derfe.

Was soll„s, die „körperliche Züchtigung“ wie„s so vornehm geheeß hat, die hat„s bei uns in de Volksschul ah noch gebb, als Ohrfeisch un Batschhännche. Ei wann mir domols schunn im Grundgesetz geschdann hädde, do hädde unser Lehrer ihr blooes Wunner erlebt!