Mundart-Kolumne: Do bische platt Mir in Zweebricke hann de Revoluzzerverein veschlof

Des do hat mich werklich gefreet: Am Geschdied is e Dafel zum Gedächtnis ans Reschiment Royal Deux Ponts ingeweiht worr. Des hat nämlich bisweile gefehlt: e Wirdischung vun denne Soldade, die weltberiehmt worr sinn un im Unnerschied zu annere, die in unsrer Stadt schunn mit Denkmäler geehrt werre, ausnahmsweis e Kriesch gewunn hann. Un e Stroß is bisher ah net dennoh benennt worr, soviel ich weeß.

Do hann jetzat erschd die Dame vun de „Daughters of Revolution“ zu uns komme misse, um an des historische Reschiment vum Christian IV. zu erinnere, der desjohr sei 300. Gebordasdaa hat. Aller, mir hann se jo net werklich vegess, im Rathaus steht die Reschimentsfahn, un in de Ausstellung fer de Herzoch hann se e eischener Raum kriet, die Siescher vun de Schlacht bei Yorktown.

So ebbes Ähnliches schunn emol gehat

So e Ve’ein wie die Revolutionsdöchder gebt’s bei uns net. Debei hammer so ebbes Ähnliches schunn emol gehat, so e Klibche vun Revolutionssöhn: Vaterlands- un Pressverein hann se sich genennt un in Hambach e bissje die Revolution ausprobiert. Un es hat e Haufe aktive Jakobiner gebb, die stolz die Revolutionsmitz gedraa hann, zum Beispiel ah die erschde Präsidende vum Appelationsgericht, die Herre Rebmann un Birnbaum. Un jetzat verood ich eich e Geheimnis: Enner vun de ledschde OLG-Präsidende hat deheem im Schrank ah so e Jakobinerkapp; er wohnt in Ixem, mehr werd net verood.

Komisch, dass noch kenner vun uns Zweebricker uff die Idee komm is, denne Ve’ein, der die erschd demokradisch Veanstaldung in ganz Deitschland gewest is, widder ins Leewe se rufe. Die Humborjer hann des mit ihrer Siwwerpfeifferstifdung so gemacht, obwohl se domols im Vormärz bloß e klennie Neeweroll gehat hann. Un mir in Zweebricke hann’s halt mol widder veschlof.

Ausstellung iwwer de Herzoch is Ehresach

Un weil sich des ännere muss, is es fer jeden gude Birscher vun unsrer Stadt e Ehresach, dass er sich die Ausstellung iwwer unser Herzoch Christian anguckt. Der war nämlich seiner Zeit voraus, hat sich net als Ferschd vun Goddesgnade vestann, sonnern sich um sei Leit gekimmert un ne uffs Maul geguckt, wie mer so saat, e uffgeklärter Ferschd eewe. Er war fer die Palz im Klenne des, was de Kaiser Josef zu de selb Zeit in de groß Donaumonarchie war. Immerhin hat er ah e Määde ausm Volk geheirat, sei Mariannche, was domols schunn e Sensation un e Skandal war. Un die zwee äldschde Buwe aus der morganadisch Eh, de Krischan un de Willem, die hann als Kommandeure bei de Royale Reschimender Karriere gemacht un uff de Seit vun de Generäl Washington un Lafayette fer de Amis ihr Unabhängischkeit gekämpft. Domit simmer widder am Anfang vun meiner Geschicht iwwer die Revoluzzerdöchder, die am Geschied die Erinnerungsdafel fers Zweebricker Royale Reschiment ingeweiht hann.