Mundartkolumne: Do bische platt Jede Morje hör ich im Bett mei privates Vochelkonzert
Er hat uns noch net so arisch vewöhnt, de Friehling desjohr, un sei blaues Band is bloß ab un zu e bissje gefladdert. Abber er is do un net se iwwersiehn. Vor allem net se iwwerhöre: Jede Morje so um die sechs erum mach ich in de Schlofstubb es Fenschder zum Gaade uff un lee mich dann dabber widder ins Bett serick. Dann mach ich die Aue zu un hör es Vochelkonzert.
Vor allem die Amsel, die im Rotdorn ihr Neschd gebaut hat, leed sich schwer ins Zeich, tiriliert un zwitschert, als krät se’s bezahlt. Ah die Meisjer mache mit un sogaa die Schbätzjer tschilbe munder dezwishe. Mer kennt menne, die ganz Vochelschar is vesammlt, so wie in dem schöne Liedche, vetreibt die Nacht un begrießt de neie Daa. Aller, ich hör e Weilche zu un schlof dann nochmol in. Zum Wachbleibe is ah schbäder noch Zeit.
Wann ich dann ausgeschlof un guud gefriehstickt hab, geh ich mi’m Hundche nunner an de Bleecherbach. Dort sinn annere Vöchel debei, de Friehling se begrieße. Die Ende un die Duckendcher schwimme uffgereecht hin un her, hann Zores minanner un schlaan mit de Flüchel. Die Nilgäns sinn ah schunn unnerwegs un fliehe ihr Runde hoch am Himmel. Un mer hört’s Palaver vun de Krähe drunne in de Allee. Ah die Bisams sinn munder, raschele dorchs hohe Gras un tauche ins Wasser. Es kommt mer vor, als wär die ganz Nadur uff de Been un in Uffruhr. Nur mir zwee, mei Romi un ich, hann die Ruh weg, losse uns Zeit un gehe gemiedlich spaziere, freeje uns am erschde Flieder in de Gärde un an de Gänsebliemelcher in de Wies. Ihr Leit, mir hann mol widder de Winder iwwerstann un sinn noch am Lewe, was wolle mer meh!
Jetzat komme ball widder die Zuchvöschel aus’m Süde serick. Bei e Mauerseeschler dauert’s noch bis Anfang Mai, dann sause se widder iwwer die Dächer un suche unnerm Kannel ihr alde Neschder. Als ich e Lauser in korze Ledderhosse war, hat des die schönschd Zeit vum Johr ingeleit: Es Schwimmbad an de Schließ hat uffgemacht un de Langhauser hat an seim Lade es Eisfähnche nausgehonk.
Hab icb eich schunn die Geschicht vezählt, wie die Mauerseeschler zum Widderaufbau vunn unsrer Stadt beigetraa hann? Ja? Macht nix, e guudie Geschicht kammer ruhisch zweemol vezähle. Also, wie die Vöschel im Mai 45 aus Afrika serick komm sinn, war vun de Stadt Zweebrigge kaum noch ebbes se siehn. Die Haiser, die Dächer un ah die Neschder ware veschwunn, bloß noch Trimmer iwwrisch. Awwer so wie die Mensche, die serick komm sinn, hann ah die Mauerseeschler ihr aldie Heimat net uffgebb. Sie hann in de Ruine neie Neschder gebaut un so geholf, dass die Stadt iwwerlebt hat.