Zweibrücker Mundart 
Heemweh weje de Theresiestroß un de Amaliebrick
Ich free mich immer arisch, wann sich alde Freinde uff mei Mundartglosse do in de RHEINPALZ bei mer melde. Vor e paar Daa hat mich enner drunne in de Allee angesproch. Ei denne hab ich im erschde Moment gaa net gekennt: de Jörg Münzner, der heit in Leonberg lebt. Er war mit seiner Fraa mol widder zu Besuch in de alt Heimat, un mir hann uns ganz zufällisch getroff. Ei er gräd jedes Mol e bissje Heemweh, wann er mei Geschichdcher lese dääd.
E annerer, de Lutz Walk, schreibt mer ab un zu un erinnert sich an unser gemeinsamie Schulzeit. Ihn hat’s weit in de Norde veschlaa. In e klenner Ort bei Oldebursch. Mir zwee, de Lutz un ich, sinn Gebordsdaa-Zwillinge: beide am 30. März 1943 in Zweebricke gebor, er im Evangelische un ich im Kadolische Krankehaus – desweje simmer uns domols net glei begeschend, sonnern erschd e paar Johr schbäder in de Alleeschul. Dort hammer bei de Fräulein Wolf in de selb Klass lese, schreibe un rechne gelernt.
Immer, wann er sich bei mir meld, guck ich mer des Klassefoddo an: Ich steh ganz hinne bei de Große links auße (des hab ich schbäder beibehall), de Jörg steht in de selb Reih ganz rechts, de Lutz hockt unne am Bodde, glei neewe’m Nobbes Schöndorf. Noch enner will ich nenne, denne ich ab un zu treff: de Dieter Bucholz hockt direkt vor mir un grinst frech.
De Lutz kriet mei Beiträch vun seim Freind Heiner geschickt. Dort owwe bei Oldebursch gebt’s inzwische e Zweebricker Kolonie. De Jürgen Grund gehört dezu. Des is de Enkel vun de Frau Grund, bei der ich als Lauser in de Glockegass die Milch geholt hab. De Gerd Seegmüller aus Oberauerbach un sogaa enner aus’m Kandon is debei: de Uwe Otterbach aus de Landauer Stroß. Alla, schunn im Gymnasium hann sich unser Weesche zum Deel getrennt, weil de Jörg un ich ins Nadurwissenschaftliche gang sinn, de Lutz, de Nobbes un de Uwe hann sich des net getraud un sinn zu de Humanischde, awwer trotzdem is ebbes aus ne worr.
De Lutz hat mer deledschd geschribb, dass es bei ihne e Theresiestroß gebt un e Amaliebrick, un ah des dääd ne an sei Heimat erinnere. Er hat halt net bloß in de Schul guud uffgebasst. Die Theres war nämlch mi’m echde Widdelsbacher veheirat, mi’m Könich Ludwich, der jo noch Zweebricker Blut in seine Adere gehat hat. Un ihr Filius Otto hat die Amalie vun Oldebursch geheirat un is mit ihr schbäder noh Griecheland als Könisch vun de Hellene. Do kammer mol siehn, zu was es mir bairische Pälzer gebrung hann.