Do bische Platt 
Es Fichsje un es Mussig-Café sinn fort
Heit vezähl ich eich mol widder, was es Neijes in unsrer Hauptstadt Berlin gebt. Mir drei, mei Fraa, unser Hündche Romi un ich, mir ware deledschd vier Woche dort bei unsre Kinner un Enkelcher. Frieher hann mich die Enkelcher immer laut begrießt mit „Oba, Oba!“ un sinn mer um de Hals gefall. Desmol hann se „Romi, Romi“ geruf un de Hund gestreichelt.
Ah sunschd werd vieles nimmie so wichdisch genumm. Zum Beispiel die Elektro-Roller. Vor de Corona war des es Tachesgespräch: Die Dinger wäre brandgefährlich un unser Unnergang. Jetzat kräht kee Hahn meh dennoh. Uff enner E-Scooter komme drei U-Bahne, finf Hunde, zeh Baustelle un zwansisch Fahrräder. Ich wett, dass mer ball de erschde Verein zum Schutz vum E-Roller grind. Awwer es gebt eschde Corona-Opfer: Unser klennes Café Lyrik ganz in unsrer Näh, wo mer gern beim Jazz un Chanson unser Bierche gedrunk hann, hat de Virus net iwwerlebt, schad.
Dodefor die wilde Viecher in de Stadt, die sich angeblich vemehrt hann, weil’s e paar Woche uff de Stroße arisch ruhisch zugang is un die Leit lieber die Wälder unsicher gemacht hann. Jetzat zählt mer net bloß die Wildsäu un die Karnickel, ah Waschbäre, Fichsjer un Dachse soll’s jede Meng gebbe. Also uns is do kenns vun denne begeeschend.
Im Geeschedeel: Wie mer am erschde Owend in unsrer Eckkneip gehockt hann, hammer nohm Fritzje gefroot, dem mundere Fichsje, des immer geje acht Uhr vorbeigestrolcht is. Ei neh, des Fritzje dääd sich nimmie blicke losse, weil se uff seiner Wies in de Näh, wo’s die Mais gefang hätt, e mords Wohnblock baue. Do sieht mer’s mol widder: Die Zwölfender vetreibe iwwerall die klenne Diercher. Unser Romi hat sich mit de Großstadthunde gut vestann un sich im Kiez glei ingelebt.
Un dann is uns ebbes anneres uffgefall: Iwwerall am Stroßerand un in de Grienstreife wachst e neijie Sort, die’s vor e paar Monade dort noch net gebb hat. E Getreide mit klenne Ähre, das denne Großsstadtleit wahrscheinlich gaanet ufffallt. Es hannelt sich um die Mäusegerschd, die bei uns an jedem Feldweesch dehemm is. Als Buwe hammer die Ähre abgeriss un mi’m Zeichefinger geköppt, enfach so, weil’s Spaß gemacht hat. Ich hab’s glei mol ausprobiert, un es hat noch geklappt. Wieso awwer kommt die Mäusegerschd noh Berlin, midde in die Stadt? Hat des ah mit dem Virus se duun? Odder ehr mi’m Klimawandel? Wahrscheinlich gebt’s ball die erschde Veschwörungstheorie dezu.
De Wacke Michel fahrt mit heem
Vier Woche hammer’s ausgehall, dann hat’s uns gereicht. Mir hann uns ins Audo gesetzt, sinn Unner de Linde langgebreddert, hann die Scheibe runnergedreht un alle drei aus voller Kehl em Michel Wack sei scheenes Liedche gesung: Ich will heem noh Zweebricke!