Zweibrücken Do bische platt: Wie die Maikäfersuppe erfunden worden ist

Als Kind hat unser Kolumnist mit seinen Freunden Maikäfer in einer Zigarrenkiste gesammelt und daheim fliegen lassen. So sei die Maikäfersuppe erfunden worden – behauptet er.

Mei lieber Scholli, jetzat is de Mai ah schunn faschd widder erum, un schunn ball hammer die erschd Hälft vun dem Johr geschafft. Debei kommt mer’s vor, als hätt’s grad erschd angefang, des Johr 2025. Je älder de werrsch, um so schneller flieht se vorbei, die Zeit. Dodebei hab ich’s eischentlich gar nimmie eilisch un dääd mer gern Zeit losse mit allem – vor allem mi’m älder werre. Awwer do kannsche nix mache, die Brems, uff die de trete kannsch, demit die Fahrt dorchs Lewe langsamer werd, hat noch kenner erfunn.

Awwer serick zum Wonnemonat, an dem mer noch e paar Daa hann. Es is die schennschd Zeit vum ganze Johr, alles grient un blieht, die Welt is widder bunt un voller Gesang vun de Vöchl im Gaade un de Schlacher im Radio. Die Mauerseeschler fliehe widder ums Haus, es Freibad an de Schließ hat uffgemacht, die Eisdiele hann Betrieb, die Maibowle hat geschmeckt. Alles is wie immer im Friehling – bloß enns fehlt, awwer net erschd in dem Johr: Wo bleibe die Maikäwwer? De Reinhard Mey, der jo so heeßt, sich abber annerschder schreibt, hat’s schunn vor Johrzehnde gesung: Es gebt kee Maikäwwer meh! Schuld dran sinn die Förschder, die in de Wälder Gift geje die arme Diercher gestreut hann, bloß weil se e paar Laabbääm ratzekahl gefress hann. Obwohl se desentweje inzwische arisch selde sinn, stehe se net unner Nadurschutz wie die Krähe. Un die Kinnercher misse se sich heit im Internet angucke.

Um die Küchenlampe geflogen und in den Suppentopf gestürzt

Mir ware frieher die reinschde Käwwerdompteure, hann die Brummer owends unner de Stroßeladern ingesammelt un in Zigarrekischdcher gesteckt. Es hat drei Sorte gebb, je noh de Farb vun die Deckflischel: Die dunkle ware die Schornschdefeescher, die helle die Bäcker un die rode hammer Kaiser genennt, weil die, wie jeder weeß, rode Nase hann vum Rodwein.

Deheem in unsrer Kisch hab ich se fliehe losse, sie sinn um die Kischelamp gesurrt un dann in de Suppehawe abgesterzt. So is die Maikäwwersupp erfunn worr. Wie mer de Lehrer Hartmann in de verde Klass gehat hann, hammer unser Käwwerkischcher mitbringe un die Käwwer in de Klass fliehe losse derfe. Anschließend sinn die Fenschder uffgemacht worr, un die ganz Armada is ab ins Freie, wo schunn die Schbätzjer un die Finke uff se gewaad hann. Un wann die Käwwersäsong an de Pingschde zu Enn gang is, hann sich die Hinkel im Stall gefreet un se fresse derfe, die liebe Diercher. Domols hat sich halt noch nimand um die Ardevielfalt Gedanke gemacht, un die Nadur war iwwerall – net bloß im Gaade, ah im Schulranze, unner de Kischelamp un im Suppehawe.

An enner Stell gebt’s heit noch jedie Meng Maikäwwer: Im Supermarkt hocke se in de Regale un sinn aus Schokolad. Ob die Kinnercher wisse, dass des alles Schornschdefeescher sinn, weje de dunkelbraun Farb?