Zweibrücken Do bische platt: Warum auch in Zweibrücken Demokratiegeschichte geschrieben wurde

In dieser Folge der Mundart-Kolumne „Do bische platt“ ärgert sich Wolfgang Ohlert darüber, dass Zweibrücken in Sachen Demokratiegeschichte oft links liegen gelassen wird.

Ich hab mich neilich mol widder rischisch uffreesche misse. Do hann se doch vor zwee Woche es Hambacher Schloss als „Ort der Rheinland-Pfälzischen Demokratiegeschichte“ ausgezeichnet un als Symbol e Rednerpult uffgestellt. Aller, nix degeje se san, weil dort 1832 uff’m Hambacher Feschd jo werklich ebbes fer die Demokradie gemacht worr is. Uffgereecht hab ich mich nur desentweje, weil’s in dem Zammehang geheeß hat, dass devor schunn Määnz un Berschzawwere dieselb Auszeichnung kriet hann un im nächschde Johr Laudre un Kowelenz dran wäre. So hätt’s unser Landdaach beschloss.

Ja, un was is mit uns?, hab ich mich gefroot. Is dann in Zweebricke net ah Demokratiegeschichde geschribb wor, un zwar net se knapp! Ei, es Hambacher Feschd hätt’s jo garnet gebb, wann die Demokrade im Wertshaus Ladeberscher net sevor de Vaterlands- un Pressverein gegrind hätte. Ei, vielleicht wär heit noch de bairisch Keenisch am Ruder, wann de Schüler, de Wirth, de Cullmann un de Ritter (jo weje mir ah de Siebenpfeiffer, demit die Humborjer Ruh gebbe) net Rabatz gemacht un 1832 uffs Schloss bei Neistadt marschiert wäre. Dann hätt’s schbäder ah kee Määnzer Republik un ah kee Berschzawwener Uffstand gebb, fe die mer des Rednerpult uffgestellt hat. Ei, do misst mer bei uns an jedie Eck so e Pult als Auszeichnung hinstelle, weil von unsrer Stadt die demokradisch Beweschung in de Palz ausgang is. Die Zwockl in Minche hann des domols begriff. Desweje hann se de Mitglieder vum Presseverein jo ah e Johr schbäder allegar de Prozess gemacht. Un was is debei rauskomm? Nix, weil’s Zweebricker Appelationsgericht all freigesproch hat. Die Zwockl hann nämlich iwwersiehn, dass de Gerichtspräsident Birnbaum ah e ehrlicher Demokrat un sogar e Jakobiner war. Aller, des hat er dann korz druff bieße misse.

Haben die hohen Herren den Geschichtsunterricht geschwänzt?

Awwer dodevunn wisse se im Määnzer Landaach offenbar nix. Des erinnert mich dran, wie se vor zwansisch Johr die „Straße der Demokratie“ gegrind hann. Die is vun Frankford iwwer Määnz, Neistadt, Heidelbersch, Mannem bis nunner noh Rastatt gang. Domols hann se Zweebricke (jo, weje mir ah Humborsch) enfach links leije losse. Do hann die hohe Herre, die die Entscheidung getroff hann, offenbar allegar de Geschichtsunnericht geschwänzt.

Weil mer jetzat grad beim Thema sinn: Angeblich werd im Rathaus immer noch iwwerleet, wie mer des Kuldurhaus in de Hofenfelsstroß nenne soll, des frieher mol mei Gymnasium war. Un do hab ich meine Ohre net getraut: Mer denkt doch werklich an de Siebenpfeifer, obohl der jo e Humborjer war. Als ob mir net selbst genunk uffrechde Demokrade hätte. Ei, ich dääd fer de Schorsch Ritter plädiere, des war e liberaler Mann un e guder Buchdrucker noch dezu. Allerdings wär’s langsam Zeit, dass mer so e Haus endlich mol noh enner Frau nennt. Un do hätt ich e Idee: Wie wär’s mit „em Schorsch-Ritter-sei-Fraa-Kuldurzendrum“?!