Zweibrücker Mundart Do bische platt: Vum Harry, Gerard un vum Buddy

Neilich is beim Feierowendschöppche die Redd uff die Stolbersteen komm, die an die jüdische Familie Dellheim un Eskeles erinnere. Dodebei hab ich mich mi’m Paul so in die Hoor kriet, dass de Bruno, unser Wert, mi’m Wischlumbe dezwische gang is. De Paul hat gemennt, er kennt’s nimmie höre, des wär doch alles lang vorbei, mer sollt endlich Ruh gewwe. Ei Paul, hab ich gesaat, du vezählsch doch stännisch, dass du so gern de Beethoven hörsch un e Sammlung vun faschd all seine Werke hasch. Ei was des mit de Stolbersteen se duun hätt, wollt er wisse. Bass uff, hab ich gesaat, hör endlich mit dem olle Beethoven uff, der is schunn 200 Johr unnerm Boddem, jetzat gebb endlich Ruh.Ei des wär doch was ganz anneres, hat er sich uffgereecht, de Paul, des kennt mer doch net vegleiche. Eewe doch, hab ich ’m widdersproch, beides gehört zu unsrer Kuldur un Geschichd, des eene zu de dunkel Seit, des annere zu de hell. Un mer derf sich eewe net bloß die Rosine aus unsrer Vegangeheit rauspicke un die schlimme Sache unner de Debbich kehre, sunsch bleibt mer sei Leewe lang e Depp. Er hat’s erschd ingesiehn, wie ich ’m die Fauschd unner die Nas gehall hab. Un dann hab ich ’m die Geschichd vum Harry, vum Gerard un vum Buddy vezählt.

Ihr ganz Leewe lang mit unsrer Stadt vebunn gefiehlt, ohne Groll

De Gerard Koch un de Harry Simon hann mit ihre Familie in de Kaiserstrooß Nr. 1 gewohnt, bis zum 19. November 1938. Die zwee Buuwe hann mit Mieh un Not de Naziterror iwwerlebt, de Harry noh enner Odysee dorch die ganz Welt, iwwer Australie bis in die USA, un dort hat er sich de Name Somers zugeleet. De Gerard is derweil in Paris geland. Die zwee hann sich ihr ganz Leewe lang mit unsrer Stadt vebunn gefiehlt, ohne Groll, denn es war jo ihr Heimat gewest. De Gerard Koch war noch 1999 bei seiner Ausstellung drowwe in de Reithall vun de Weiß Kasern uff Besuch, un mer kann heit enne vun seine Installatione im Rathaus siehn. De Harry Somers hat e paar Mol die Familie Wehrfitz besucht, un dort hab ich ne kennegelernt. Er war driwwe in de Schdaade e anerkannder Kinschdler un hat seiner Heimatstadt e scheenes Gemälde geschenkt, des heit in irschend enner Eck de Staab fangt. Alle zwee sinn vor e paar Johr im hohe Alder gestorb.

Un de Buddy, hat de Paul ganz kleenlaut gefroot. Ei de Buddy Elias war de Cusseng vun de Anne Frank. Er un sei Fraa Gerti hann 2011 bei uns im Herzochsaal zamme aus de Briefe vun ihrer Familie vorgeles, do häddsche kenne e Stecknodel falle höre.

Un genau so leis hammer unser Feierowendschöppche ausgedrunk un sinn ganz friedlich zamme heemgang.