Zweibrücken Do bische platt: Von Fußballprofis mit Schlappen, die nicht mehr Schlappen heißen

Unser Kolumnist ist sich im Rückblick recht sicher, dass er derjenige war, der den Schuss mit dem Seitspann erfunden hat. Das war nötig wegen seiner großen Füße.

Aller neier Mode daucht nix, hat mei Oma Gretel oft gesaat, un sie hat merschdens Recht gehat. Dodran hab ich neilich denke misse, wie ich im Fernseh die Reklame iwwer die Slipins gesiehn hab. Des sinn bequeme Halbschuh, in die de enfach mit de Fieß enin schluppe kannsch, ohne dich se bicke, ohne Schhulöffel un Nischdele, so e Art Schlappe. Halbschuh un Schlappe saat mer heitsedaas awwer nimmie, sonnern Slipins.

In de Werbung hat e bekannter Fußballer gezeit, wie praktisch des is. Er laaft mit em große Koffer in jeder Hand dorch sei Wohnung un schluppt unnerwegws dabber in die Laadsche, die jetzat Slipins heeße, ohne sich se bicke un ohne die Koffer absestelle. Dodebei lacht er un freet sich, dass des so leicht geht. Weshalb er mit de Koffer dorch die Wohnung spaziert un se net abstelle will, saat er net. Korz druff hockt er uff de Chaiselong, balanciert e Fußballe uff’m Kopp un schluppt schunn widder in die Slipp-Schlappe, ohne Hänn un ohne hinsegucke. Ancheins is er inzwische wennischens die Koffer los worr.

Früher war der Schuhkauf eine Zeremonie

Ich hab an die Oma Gretel gedenkt un iwwerleet, ob ich mer so e Paar moderne Schuhcher leichde soll. Aller, ich laaf net mit zwee Koffer dorch die Wohnung un balancier ah kee Balle uff’m Kopp. Awwer ich dääd mer’s Bicke spare, un des fallt mer in ledschder Zeit nimmie so leicht. Annerserseits hab ich grad geles, dass mer im Alder die Mobilität trainiere soll, vor allem mit Kniebeische un de Hocke. Wahrscheinlich gebt’s ball ah dodefor exdrane Senioreschlappe, bei denne mer sich besunnersch dief un lang bicke muss, wann mer se anzieht. Es beschde werd sinn, ich kaaf mer so e Paar bequeme Schlupp-Schlappe un glei noch e Paar Bick-Schlappe dezu. Dann kann ich se Daa fer Daa wechsele un bin fer alle Fäll vesoit.

Wie ich e Kind war, des is schunn e Weilche her, war des Schuhkaafe e richdischie Zeremonie. Weil domols mei Fieß jedes Johr Sticker zeh Santimeder gewachs sinn, hab ich jede Herbschd neie Winderschuh kriet. Dodruff hab ich mich jedesmol gefreet, weil’s beim Schuh-Schneider die Lurchi-Heftcher gebb hat, die ich gesammelt hab. Im Friehling hab ich bloß alle zwee Johr neie Halbschuh kriet. Im Zwischejohr hat mei Vadder vorne die Kappe abgeschnitt, sodass mei Zeewe genunk Platz gehat hann. Sie hann jetzat neigierisch vorne enaus geguckt wie die Deichsel am Handwäänche. Beim Fußballspiele hab ich vedammt uffbasse misse, dass die Zeewenäschel de Balle net kabutt gemacht hann. Domols hab ich desweje de Kick mi’m Seitspann erfunn, mit dem der beriehmde Fußballer mit de zwee Koffer schbäder die Doore geschoss hat. A propos Koffer: Jetzat guck ich emol dabber noh, ob ich noch zwee gude Koffer hab, falls ich mit meine Schlappe mol vereise will.