Zweibrücker Mundart Do bische platt: Unser Wert will uns adobdiere

Gottseidank, mir kenne vum Bruno seim Kohlekeller ball widder nuff an die Thek wannere, bevor mer all de Kohlekellerkoller krien. Awwer die Corona-Zeit is noch immer net vorbei. Es wär weider Vorschrift, meent de Bruno, unser Wert, dass mer beim Feierowendschöppsche e Meder un fuffzich ausenanner stehe. Do hat de Paul die rettend Idee gehat: Fer die Stammfamilie dääd des net gelde, desweje sollt de Bruno beim Amtsgericht de Andraach stelle, dass er uns zwee adobdiert. Mol siehn, ob des klappt. Dann kenne mer uns ball widder an de Thek wejem Fußball richdisch in die Hoor krien.

Warum kee Championship im Westpalzstadion?

Dort bei de Fußballer klappt des wahrscheinlich net, dass de Trainer sei ganz Mannschaft adobdiert. Desweje reicht’s ah net, dass mer bei denne Geischderspiele in Zukunft uff’s Publikum vezichd un se bloß im Fernsehe iwwertraat. Die Spieler solle wejem Corona all mit Mundschutz spiele. Des hat de Vordeel, dass se ah es Gesicht als Werbefläch nitze kenne. Un weesche de Hygiene hann se sich neije Reeschele ausgedenkt: Fer’s Schbautze, Umarme un Schwitze gebt’s die rood Kaad. Die Virologe menne iwwrischens, mer missd bloß schnell genuch renne, dann käme die Vire nimmie noh. Un bei jeder Spielunnerbrechung soll de Schiri glei die ganz Corona teschde.

Wammer uff’s Publikum vezichd, hab ich iwwerleet, braucht mer eischendlich beim Championship ah nimmie dorch die ganz Welt se reise un irschendwo in Spanie odder uff de Shetland Insle se spiele. Es wär doch veninfdisch, sich uff e zendrales Stadion se eenische, zum Beispiel uff de Betze. So kennt de FCK sei viele Schulde loswerre. Odder warum net gleich bei uns im Westpalzstadion? Des wär noch billischer se hann.

De schenschde Schienbeenbruch

Ich wunner mich, dass se jede Daa in de Zeidung noch drei Sportseide vollkrien, wo doch kaum noch e Sport erlaubt is. Awwer die Sportjournalischde losse sich immer widder was Neijes infalle. Geschder hat jetzat endlich mol enner die Geschichd vezählt, wie de Werner Liebrich bei de Weltmeeschderschaft 1954 im Endspiel em Eckel Horst voher die Nischdele vun seine zwee Schuh heemlich zammegeknibbelt hat – un der hat des erschd korz vor de Halbzeit gemerkt. Morje kommt dann die Fortsetzung, wie sich de Horst in de Saune gerächt hat. Un ah im Fernsehe wisse se sich se helfe. Sie hann deledschd es „Tor der Nachkriegszeit“ gewählt un mache jetzat mi’m „Fehlschuss des Jahres“ weider, wo also enner aus zwee Meder iwwer’s leere Door ballert, odder statt geje de Ball geje de Schiedsrichder treed. Anschließend kommt dann de schenschde Schienbeenbruch un als so weider. Mit annere Worde: Sie zeiche die Höhepunkde un losse des langweilisch Gekicke zwischedrin enfach weg. Ei do brauche mer doch gaa kee Geischderspiele, un ich muss beim Feierowendschöppche nimmie mi’m Paul dischbediere.