Zweibrücker Mundart Do bische platt: Mir hann Feierowend im Homeoffice gemacht

Was war dann ledschd Woch los, hann mich die Leit gefroot; wesweje hasche dann nix iwwer eier Feierowendschöppche geschribb? Ei ganz enfach: Corona war los, un desweje hat de Bruno sei Kneip widder zumache misse, un mir, de Paul un ich, hann vor de zune Dier gestann. Desmol kenne mer ah net in sei Kohlekeller ausweiche wie beim ledschde Lockdown im Friehjohr, weil’s dort viel se kalt un duschder is. Awwer so ganz wolle mer halt uff unser Feierowend ah net vezichde. Un do hat de Paul e guuder Infall gehat.

Mer mache’s wie die Geschäftsleit, hat er gemennt, mir drinke unser Feierowendschöppche enfach im Homeoffice! Ei wie soll dann des gehe, hat de Bruno iwwerleet, ich kann eich doch mim Compuder kee Bier zappe. Ei nee, hat ne de Paul ausgelacht, bassn uff, ich erklär’s eich. Mir hocke uns jeder fer sich deheem in aller Gemiedsruh an de Compuder un schalde uns iwwer Zoom zu enner Online-Konferenz zamme. Unser Bier drinke mer jeder aus de Flasch, des muss halt emol reiche. Jedenfalls siehe mer uns un kenne minanner e bissje vezähle, so als dääde mer an de Thek beinanner hocke. Nur so kenne mer des Corona ohne psychische Langzeitschäde iwwerstehe. Hanner des vestann, ihr Dummbeidel.

Aller, de Bruno hat sei Finche frohe misse, weil die sich mi’m Internet besser auskennt. Awwer dann hat’s tatsächlich geklappt. Mir alle drei hann deheem e jeder fer sich am Bildscherm gesess un uns mit unsere Bierflasche zugeproschd. De Bruno hat se’erschd angefang, Hochdeitsch se redde, weil er gemennt hat, des misst mer im Internet so mache.

Dann war er ah glei veschwunn, un es hat e Weilche gedauert, bis sei Finche die Vebindung widder hergestellt gehat hat. Ei er hätt mit seim Wischlumbe iwwer die Taschdatur gewischt, so wie er des mit seiner Thek immer macht, hat’s Finche uns vezählt, awwer es hätt’m de Lumbe abgenumm, un jetzat wär Ruh.

De Paul is alle paar Minudde korz veschwunn un war dann ganz außer Adem widder an seim Platz. Ei er hätt geles, dass mer sich beim Home-Office zwischedorch beweesche missd, sunsch kennt mer e Herzinfarkt krien, hat er uns erklärt. Desweje hätt er sich die Treppelääder neewe de Compuder gestellt un dääd immer mol widder dabber enuff un widder enunner krawwele.

De Bruno degeje hat sich ohne sei Wischlumbe gelangweilt un is ball druff ingeschlof. De Paul war stännisch weje seiner Treppelääder außer Adem, un mir is ball nix meh ingefall. Aller, hammer noh zeh Minudde halt mit unserm erschde Feierowendschöppchehomeoffice Schluss gemacht, do war mei Bierflasch noch net leer. Des Corona is eewe doch e großer Mischd.