Zweibrücker mundart Do bische platt: Mir hann de Mao hinner unserm Haus

Jetzat kommt er mit aller Macht un is nimmie se bremse, de Friehling mit seim blooe Band. Ich steh uff’m Balkong un guck enunner, wie er sich im Gaade breetmacht. Im März hat er sich noch serick gehall un nix getraud, bloß die Schneeglöckcher ware in de Wies se siehn un hann de Winder veabschied. Jetzat blieht’s schunn weiß un geel un rood un bloo, die Oschderglocke schaugele leis im Wind, die Hundsveilcher recke sich, iwwerall im Gras die Gänsebliemcher: Sie wolle sich all noch dabber zeije, bevor ne die Große die Schau stehle, die Tulwe un die Rose.

Eischentlich geheert die Nadur jetzat noch net de Blume, sonnern de Sträucher un de Bääm, die’s ne mit ihrer Blüdeprachd vormache. Als erschdes ware die gelbe Forsythie an de Reih, dann hat de Rotdorn angefang, ganz zard rosa se bliehe, un jetzat mache mei Quetsche- un es Kerschebämche mit ihre weiße Bliedekrone mit. Noch ganz bescheiden, net so iwwerzwersch un angebberisch wie die Zierkersche drunne im Rosegaade, die nix anneres kenne als wie bliehe. Mei zwee Obschdbämcher degeje draan ah fleißisch, wann’s soweit is. Sie sinn ganz zufällisch un wild dort unne gewachs, die Quetsch midde im Jasminstrauch un die Kersch ganz krumm un schepp an de Mauer, bis ich se entdeckt un rer geholf hab. Jetzat hätt ich beinächschd mei Abbelbämche vegess, net viel größer wie e Bonsai; des hammer Freinde zum 60. Gebordsdaa geschenkt un losst sich mi’m Bliehe noch e bissje Zeid.

Un was wachst sunsch noch in meim Gärdche: E Birk, die hammer zu de Geburt vum Birgche, unsrer Dochder, geblanzt. E Keschd, die will erschd e rischdischer Baam werre un blieht vielleicht desjohr es erschde Mol im Mai. Un dann midde drin un faschd dobbeld so hoch wie unser Haus de chinesische Gödderbaam. Denne hat mei saarlännischie Großmudder Friedel geblanzt, wie ich achzeh war. Wie mei Vadder mitkried hat, was do hinnerm Haus in de Himmel wachst, hat er die Hänn iwwerm Kopp zammegeschlaa un geruf: Um Goddes Wille, jetzat hammer de Mao in unserm Gaade.

Domols hat de Gaade noch e ganz annerer Zweck gehat wie heit: Er war die Speisekammer mit Bohne, Rose- un Blumekohl, Gelleriebe, Salad un sogaa Erdbeere. Heit werd des nimmie vun’m velangt, un er is vor allem Wiesje. Un Heimat vum Mauerwolf, der zum Glick noch sei Ruh halt un kee Burche baut.

Jetz im Friehling is es am friehe Morje voller Poesie, mei Gärdche. De Tau funkelt im Gras, die Vechelcher singe un baue ihr Neschdcher, un wammer uffbasst, kammer ah schunn die erschd Hummel brummele höre. Un wammer noch e bissje meh die Ohre schbitzt, hört mer sogar die Oschderglocke ganz leis bimmele.