Zweibrücken 
Do bische platt: Hunger un kalde Fieß im Iwwerfluss
Ledschd Woch war de 80. Johresdaa vum End vum Zwedde Weltkriesch. „Tag der Befreiung“ heeßt de 8. Mai jetzat offiziell, un gemennt is die Befreiung vun de Nazi-Herrschaft. Des is heit die polidisch Sicht uff die Zeit domols, un des is ah net vekehrt. Tatsächlich befreit worr sinn die arme, gequälte Mensche in de Konzentrationslaacher, awwer ah es ganze Land vun de Angschd vor de Bombe un’m Schrecke, denne nachts de Fliescheralarm ausgelöst hat. An e polidischie un militärischie Befreiung hat domols nimande gedenkt: De Kriesch war velor un domit oft die Heimat, es Haisje, de Vadder odder de Bruder. Un de Friede war in de erschd Zeit armselisch un miehsam. Mei Muddie hat gesaat: Die erschde zwee Johr nohm Kriesch ware die schlimmschde in meim Lewe, bloß enns hammer im Iwwerfluss gehat, Hunger un kalde Fieß. Un mir hann in de französisch Besetzungszone gelebt, net in de Befreiungszon. Befreit gefiehlt hat sich domols nimande.
Getrampel im Central-Kino
Mit enner Ausnahm: Mir Lauser ware frei un frech wie junge Hund un hann uns so richdisch ausgedobt. Des war allerdings erschd e paar Jährcher schbäder. Mir hann mit Gipsbrocke „Ami go home!“ an die Mauer geschribb, sinn mit de GIs neeweher marschhiert un hann gesung: Links, rechts, links, hinnerm Hauptmann stinkts. Es hat nimmie lang gedauert, un mir hann ah unser eischenie Mussik gehat, die uns vum Rudi Schuricke befreit hat: Des war anfangs de Jazz un de Boogie-Woogie mi’m Fats Domino un korz druff de Johnny Ray mi’m Rock ’n’ Roll, erschd dennoh de Bill Haley un de Elvis. Es stimmt also, dass uns die Amis befreit hann, uns Buwe, die mer jetzat Halbstarke genennt hat, awwer net mi’m Milidär, sonnern mit de Mussik. Un ah mit de Bluejeans, die uns vun de korze Ledderhosse befreit hann! Un mi’m Schuwinggam, des die Malzguzjer ersetzt hat.
Was hammer uns befreit gefiehlt, wie mer in de Jeans im Central-Kino gehockt, e Kaugummi geknaatsch un de Film „Außer Rand un Band“ geguckt hann. Wie de Bill mit de Comets „Rock around the Clock“ geplärrt hat, hann mir begeischdert mit de Schuh de Takt getrambelt, bis de Frido Schließmeyer, de Bruder vum Kino-Könisch Jacques, dabber de Ton abgestellt hat. Do hammer dann ganz brav die Fieß still gehall, un die Mussik is widder laut gstellt worr. Bis zum nächschde Song „See you later, aligator“. Do hat sich des Spiel widderholt: Mussik aus, Fieß widder still. So brav ware mir Halbstarke domols, vun weesche außer Rand un Band! Un dann die erschd Jukebox in de Taverne am Bleecherbach. Höhepunkt war 1953 de CFN, unser eischener Radiosender drowwe uff’m Fluchplatz. Jetzat war Radio Saarbricke mit seine Schnulze abgemeld, un mir ware endgildisch befreit!