Zweibrücker Mundart Do bische platt: Es Rendnerklibche halt zu meim Hund

Bis enunner an die Schließ simmer uns eenisch, mei Hundche un ich. Dann werd’s schwierisch. Ich will de Guldeweesch entlang, die Romi hat awwer ebbes anneres vor un zieht wie verickt an de Lein Richdung Allee. Ich vezähl’m dann als, dass ich an de Hand vun meiner Muddie schunn vor siewezisch Johr uff’m Guldeweesch in die Stadt gedroddelt bin. Des intressiert mei Hundche iwwerhaupt net, un es zerrt als weider Richdung Allee.

Morjens um zeh is de Biergaade noch zu

Inzwische hann sich drei odder vier Rendner um uns vesammelt un bedaure denne arme Hund. Alla, de Klüchere gebt noh, un mir zoggele zamme Richdung Allee. Dort will ich weider Richdung Rosegaade, mei Hund will awwer iwwer’s Brickelche zur Rennwies. Ich wehr mich net, weil schunn widder es Rendnerklibche in de Näh is un bees guckd. Alla, iwwer die Brick un die Rennwies entlang. Nee, saat mei Hundche un zieht Richdung Biergaade. Aha, es denkt an die Weißworschd, vun dere’s immer e guudes Stickche abkriet. Nee, mei Liewes, saa ich, nee, du bisch err, morjens um zeh is de Biergaade noch zu. Es Hundche iwwerleet korz und gebt dann noh.

So marschiere mir zwee einträchdisch dorch die Allee an de Rennwies. Wär jo ah gelacht, wann mei Hund se bestimme hätt! Es is e wunnescheener Weesch unner de Bääm entlang, in de Äschd iwwer uns plärre die griene Papageie, links bläddscherd de Bach, rechts galloppiert e Gailche iwwer die Wies, Hunde pinkle an die Bääm un Jogger jogge vorbei, manchmol isses ah umgekehrt. Un ich denk: Was hann mir’s guud! Bääm un Blumme un Bäch un widder Bääm, vum Roseweesch bis enin in die Innestadt, de Rosegaade, de Klenne Exe, es Geschdied, ei es heerd gaanet uff.

Net uff Deiwel komm raus die freie Fläche zugebaut

Un wemm vedanke mer die ganz grien Pracht? Em Herzoch Krischan un seim Hofgärtner Petri, die schunn vor iwwer 250 Johr die Schlossgärde angeleet hann. Awwer wammer’s genau iwwerleet, dann isses ah de Vedienschd vun denne kluche Leit im Rathaus, die in de Johre nohm Kriesch an die Zukunft vun unsrer Stadt un domit ah an uns gedenkt hann. Denne Leit is es nämlich se vedanke, dass mer net uff Deiwel komm raus all die freie Fläche zugebaut hat, wie’s so mancher gern gemacht hätt. Was hat’s do Schnappsidee gebb: Es Schloss wollde se abreiße un e Parkhaus hinstelle; uff die Rennwies sollt es Neisprachliche Gymnasium gebaut werre, e Kaufhaus uff de Exe un als so weider.

Mei liewes Romi, saa ich desweje zu meim Hundche, was hann mir zwee fer e Glick, dass es so viele scheene Weesche mit Bääm gebt. Awwer es nächschde Mol gehe mer de Guldeweesch, un wann de dich uff de Kopp stellsch!