Zweibrücken 
Do bische platt: E Hund is kee Fahrrad un e Gaul kee Liechestuhl
Die Leserbriefe in de Zeidung sinn so e Art Abrechnung mit allem, was de Leser net basst. Heit dreh ich mol de Spieß erum un kridisier e Leserbrief, der mer net gefall hat. Do schreibt jemande, mer sollt net so e Werrwese drum mache, wann enner e Dierche umbringt, weil des nohm Gesetz bloß e Sach wär. Ich hab denne Ardikel dabber vesteckelt, dass ne mei Romi net sieht un sich driwwer uffreescht.
Nicht umsonst Teil der Schöpfungsgeschichte
Peifedeckel, mei liewer Lesrbriefschreiber, do bische arisch err. Ganz im Geschdeel: „Tiere sind keine Sachen“, heeßt’s in Paragraf 90a BGB – un werre desweje ah dorchs Tierschutzgesetz besunnersch geschitzt. Dort heeßt’s in Paragraf 1, dass nimmande ohne Grund em Dier Schmerze, e Leid odder Schade zufüsche derf. Quäle nie e Dier zum Scherz …, hammer schunn in de Kinnerschul gelernt. Unser Grundgesetz nennt de Tierschutz als Verfassungsziel. Aller, die Vorschrifte iwwer die Sachbeschädigung im Strafgesetzbuch werre uff Diere entsprechend angewend, awwer des ännert nix dran, dass es eewe kee Sache sinn – un basda!
E Hund is kee Fahrrad un e Gaul kee Liechestuhl. Der Unnerschied leid uff de Hand: Des sinn Geschöpfe, die gebor werre, lebe un irschendwann sterbe – genau so wie mir Mensche. Un sie werre in de Schöpfungsgeschicht genennt: Am finfde Daa hat unser Herrgott alles, was sich do im Wasser, uff de Erd un am Himmel rumtreibt, erschaffe. Vun de Sache degeje kee Redd, die hann mir erfinne derfe, die Töpp un Panne, Rasemäher un Koffer, Rejescherm un Unnnerhose. Un weil se zu de Schöpfung gehöre, die Viehscher, sinn se uns Mensche anvetraut, un mir misse se schütze, so gut’s geht. Un desweje is mer der Leserbrief do neilisch arisch geje de Strich gang.
Wie clever Tiere doch sein können
Alla, werre ner jetzat vielleicht saan, un wie stehts mit de Planze, de Blume un de Bääm? Die gehöre ah zu de Schöpfung. Na ja, do gebt’s halt doch e Unnerschied. Gut, ah bei de Bääm redd mer vum Waldsterbe, un es gebt besunnersch geschitzte Planze. De Alfred Doblin, e beriemder Kolleesch vun mir, hat’s uff die Spitz gedribb un die Geschicht „Die Ermordung einer Butterblume“ geschribb. Do dääd ich dem Leserbriefschreiber Recht gebbe, dass mer’s net iwwertreibe soll.
Serick zu de Diere. Ich bin manchmol iwwerrascht, wie clever die sinn. E Beispiel: Wann ich mit de Romi drunne am Bleecherbach in die Näh vun de Nilgans mit ihre Junge komm, do schnaddert die Alt Zeder un Mordio, um ihr Junge vor dere Bestie se warne. Do neilisch frieh am Morje awwer, hat die Gänsemama bloß bös geguckt un war mucksmaisjestill. Un zwar aus gudem Grund: Die junge Gänsjer hann all minanner in de Wes gelee un noch geschlof, un desweje wollt se die Alt mit ihrm Gezeder net uffwecke. Respekt, mei liebes Schneegänsje!