Zweibrücker Mundart Do bische platt: E Hinkelche vesteht kee Englisch

Moment, hat de Paul geschder Owend an de Thek gesaat, des do muss ich eich vorlese: „Nach dem Urban Gardening kommt das Urban Lifestock Farming.“ De Bruno hat die Stern in Falde un sei Wischlumbe uff die Seit geleet. Ich hab kee Wort vestann, hat er gemennt, is des jetzat widder ennie vun denne neimodische Quizshows? Nee, hab ich gesaat, des heeßt nix anneres, wie dass es Mode werd, hinnerm Haus e Hinkelstall zu hann, un angefang hat’s demit, dass die Leit Kohl un Salad planze statt Rose un Tulbe. „Urban Lifestock Farming“ is e neijer Trend, fangt bei de Hinkele an un hört wahrscheinlich mit Küh un Geeße uff. Heitsedaas muss halt alles e englischer Name hann, sunsch daucht’s nix.

In manche Städt kann mer Hinkele miete

Jo, awwer e Hinkel vesteht doch kee Englisch, hat de Bruno iwwerleet, vielleicht mit Ausnahm vun de schottische Perlhiehner. Ei bassen uff, hat de Paul laut gelacht, es kommt noch besser! Do steht, dass mer in manche Städt Hinkele miete kann, um die Sach erschd mol ausseprobiere. Stelle eich vor: Miethinkele! Ei die Welt werd doch imme verickder! Un wie wär’s dann mit Hinkel-Leasing, hab ich vorgeschlaa: Wann die Leasing-Zeit abgeloff is, kannsche dei Hinkelche geje e neijes Modell indausche.

Des ergebt awwer schunn Sinn, hat de Bruno iwwerleet un’s nächschde Schöppche gezappt. Die Leit sehne sich in unsrer moderne Welt immer meh noh Nadur, un zu dere Nadur gehöre vor allem die Viecher. Un e Hinkelche is doch werklich reinie Nadur. Wann ich so e Hinkel gaggere hör, dann muss ich sofort an mei Oma denke, die hinner ihrm Haisje in Auerbach e großer Hinkelstall gehat hat, wo außerdem e paar Ende un zwee Gäns dehemm ware. Ei is des net die Oma gewest, die im Hinkelstall als Modorrad gefahr is, hat de Paul wisse wolle. Quatsch, hat de Bruno gesaat, awwer vor denne Gäns hab ich ordentlich Mores gehat, weil se mit ihre Schnäwwel noh mer geschnappt hann. Do war de ganze Daa von morjens in de Frieh bis Owends e Geschnadder un Gegagger, dass der’s in de Ohre geklingelt hat. Un an de Weihnachde war dann Ruh, un’s hat Gänsebroode gebb.

Appdit uff Urban Farming

Heit kannsche lang suche, bis de in de Stadt e Hinkelshof finnsch, hat de Paul gemennt. Bass uff, hat’m de Bruno widdersproch, mei Nochbar, de Klaus Burkhardt, hat sich grad in seim Gärdche e wunnerscheenes Hinkelhaus gebaut un zwee Grienleescher un siwwe Zwerchhinkelcher nin gesetzt, die all schunn leje. Ei es geht doch nix iwwer e frisches Ei zum Friehstick. Weesche was, Bruno, schlaa mer doch grad mol drei Stick in die Pann, hat do de Paul gesaat, ich krie rischdisch Appedit uff des Urban Farming. Awwer mit Speck un Zwiwwele, gell.