Zweibrücker Mundart Do bische platt: E Frolleinche im flodde Trikini

So spät wie desjohr ware mir noch nie dran. Alla es is nimmie wie frieher, wie als am 1. Mai es Freibad uffgemacht hat un mir Lauser sofort zur Stell ware, bei jedem Wedder, solang’s net geschneit hat. Awwer heier hammer uns grad ledschd Woch zum erschde mol nunner an die Schließ getraut. Net wejem Wedder hat’s so lang gedauert, sonnern wejem Corona. Mer hat sich jo die schlimmschde Sache vezählt: In de Becke wär kee Wasser, sonnern bloß Desinfektionsbrieh, mer misst e polzeiliches Fiehrungszeichnis mitbringe un am Eingang e Kaution hinnerleje, uff de Liechewiese derft mer bloß stehe un net leije, beim Schwimme wär e Mund-Nase-Schutz plus Schnorchel Pflicht un als so weider.

So frei wie frieher isses net

Do kann ich Entwarnung gewwe: Des stimmt alles net. Mer muss sich net emol vorher anmelle, sonnern kann enfach so enin. Na ja, net ganz so. Es gebt e besunnerer Weesch zum Ingang, un dort steht e Security-Mann un losst em erschd dorch, wammer sich die Hänn desinfiziert hat, un am Kassehaisje muss mer sei Personalie angewwe. Des duud awwer alles net weh. Un schunn is mer drin im Freibad un sieht glei de erschde Trikini: e Froilleinche im Bikin plus Corona-Mask.

So werklich frei wie frieher vor de Corona isses net. Schunn des Wiesje vorm Eingang is mit rotweiße Palisade ingezaint, als dääd mer de Ansturm vun de Hunne ferchde. Drin marschiert net bloß e ganzie Kompanie Bademeeschder um die Becke, sonnern ah widder Security-Kerle, die uffbasse, dass jeder denne Peile nohlaaft, die uff de Boddem gesprait sinn, demit mer sich net veerrt.

Es Schwimmbecke is in zwee Hälfde abgedeelt, ennie fe die langsame un ennie fe die Schwimmer, denne’s dummelt. Ich hab gefroot, wo der Bereich fer die ganz langsame Rentner wär, awwer denne gebt’s net. Alla, mir sinn ah glei ins Wasser, nadierlich an de Trepp, an der „Einstieg“ gestann hat, un im Kreis rumgeschwumm, wie’s Vorschrift is. Un schunn hat de Lautsprecher geplärrt: Corona-Abstand vun ennsfuffzich inhalle! Mir ware ganz alleen im Wassser, mei Fraa un ich, awwer guud zeh Meder ausenanner. Alla, simmer dabber zammegeschwumm, bis de Abstand gestimmt hat.

Schwimmstil: Dooder Hund

Mei Schwimmstil is de „doode Hund“, do beweescht mer sich kaum un kommt ah net vorwärts. Die ledschde zeh Meder gebb ich dann awwer Gas un komm desweje völlisch eschöpft am Treppche an. Erschd wie ich mit Mieh nausgrawwele will, sieh ich des Schild „Kein Ausgang“. Ich also widder serick ins Wasser un zum Ausgangstreppche, des verzich Meder weider weg war. Drauße hann die Bademeeschder schunn de Reddungsring desinfiziert, awwer ich hab’s mit ledschder Kraft grad noch selbert geschafft.

So, jetzat hab ich mich e paar Daa erhole kenne, un morje gehje mer widder nunner an die Coronaschließ.