Zweibrücken 
Do bische platt: Die I-Dötzjer fange es ABC in de Mitt an
Es is widder soweit: Die neie ABC-Schütze sinn widder ingezoo worr un ricke in die Kaserne in. Is nadierlich Quatsch, es geht ganz unmilidärisch zu, wann die Erschdklässler es erschde Mol ihr Schul besuche. Desweje gefallt mer ah der Ausdruck „I-Dötzjer“ fer die Schulanfänger besser, schunn alleen desweje, weil’s jo heitsedaas gendergerecht ABC-Schütze un Schützinne heeße misst. E deitlicher Unnerschied zu meiner Schulgeneration hab ich an denne viele Glückwünsche festgestellt, die in de Zeidung gestann hann; mol abgesiehn dodvunn, dass es sone Anongse frieher net gebb hat. Die Name vun denne Grutze hann sich geännert, sie heeße heit nimmie Dieter, Hans un Wolfgang odder Heidi, Karin un Ursel wie zu meiner Zeit, sonnern Lennard, Taylor un Linus odder Maja, Maylin un Meta. Aller, wem’s gefallt.
Es hat sich e ganzie Meng veännert, mei lieber Schollie. Ich kammer gut vorstelle, wie die Oma un de Oba ihre Enkelcher aus ihre Schulzeit vezähle, un die Klenne kaum glaabe kenne, was se do höre. Wammer die Klassebilder vun domols un heit vegleicht, do fallt vor allem uff, dass mir Buwe all minanner enns gemeinsam gehat hann: die Hoor korz geschnitt un mit Scheidel links un die korze Ledderhosse. Jetzat sieht mer Buuwe mit lange Hosse, als ginge se schunn in die Danzstunn un des midde im Summer, ei so hädde mir uns domols uff de Stroß gaanet zeije derfe. Un dann die Ranze! Meiner war aus braunem, feschdem Ledder mit em Zirkusgaul hinne druff un ferdisch. Heit heeße die Ranze wahrscheinlich gaanimmie Ranze, schillern in alle Farbe, sinn doppelt so groß wie frieher unn siehn aus, als dääde die Kinnercher demit ins Weltall fliehe. Ei mit so em Monschdrum drausche dich doch net Rammboxe se spiele: De Ranze vor die Bruscht geschnallt un mit Karacho gejenanner gerennt, dass die Fetze gefloo sinn.
Jetzat awwer serick zu dem Name I-Dötzjer. Der kommt doher, weil des I de erschde Buchstaabe is, der de Kinnercher beigebrung werd: e enfachder Strich mit em Punkt owwedruff. Aller, do ware mir frieher anspruchvoller un hann mim A angefng, wie sich des gehört. Ich weeß noch, dass ich mir anfangs es ABC als Bilder gemerkt hab. Es A war e Dach mit em Querbalke, es B e halber Wasserweck, es E e Reche ohne Stiel un so fort.
Mir hat ebbes anneres schwer gestunk: Die Frollein hat mer de Griffel aus de link Hand genumm un in die rechde gesteckt. Des wär die guud Hand, hat se gemennt, die link dääd zu nix dauche. Des war mei erschdie Erfahrung als Linkshänner. Ich bin heem zu meiner Muddie gerennt, hab Rotz un Wasser geheilt un gesaat: Des war es erschde un’s ledschde Mol, dass ich in die Schul gang bin.