zweibrücker Mundart Do bische platt: Die Eskimos hann bei uns Winderurlaub gemacht

Aller, mit dem do Winder kenne mer sefriede sinn, korz, awwer knackisch kalt. Net so e laues Winderche wie in de ledschde Johre, sonnern e klennie Eiszeit, wie sich des gehört. So wie in meiner Kindheit. Wann ich mich recht erinner, hat do immer de Schnee e paar Meder hoch gelee, es war saukalt, die Schbatze sinn als Eisklumbe vum Himmel gefall, un die Eskimos hann bei uns ihr Winderurlaub gemacht. Mir Kinner hann bei de erschde Schneeflocke de Schliede aus’m Keller geholt un die Kufe, die’s Johr iwwer Roschd angesetzt hann, mit Schneeballe blank gewienert. Dann ware mir nimmie se bremse un sinn erschd widder heem komm, wann die erschde Schneeglöckcher geblieht hann.

Mit de Schliddebahn in de Storjestrooß hammer uns schunn ball nimmie sefriede gebb, des war was fer die bludische Anfänger un die Määde, die Schneegänsjer. Unser Hausbahn war de Holzgaade, denne simmer mi’m Bauchpladscher wie de Blitz enunner gesaust bis zum Haisje vum Bahnwärder Konrad, schneller als wie de Anderl Ostler mit seim Bob. Dodebei hammer laud „Bahn frei!“ gekrisch, ah wann die Bahn frei war, halt aus lauder Iwwermut. Wehe, es is dort unne mol enner mi’m Audo uff de Chausse doher komm, denne hammer glatt bei de Bolizei angezeit.

Wann de Betrieb se doll worr is, simmer diefer enin in de Fasaneriewald un hann uns dort e Bahn zwische de Bääm gesucht, möglichst steil un vedammt gefährlich. Odder mir hann e Schliddepaus gemacht un drowwe am Bahndamm e Schneebursch gebaut. Odder hann die Schlittschuh vorgekramt un sinn nunner an die Schließ, wo se e Wiesje iwwerschwemmt un zu em klenne Eisweiher gemacht hann. Odder mir sinn uff de gefrorene Pitze geschleimert un hann uns an de Ruinefenschder e Eiszabbe abgebroch un gelutscht, bis unser Zung selwert e Eiszabbe war. Wann ich owens heem komm bin, hat mich mei Muddie erschd am Kischeowe ufftaue misse, so wie de Eispeter beim Wilhelm Busch. Dann e heißie Tass Kakao, un de Daa war perfekt.

Die ledschd Woch hab ich des alles meiner liewe Frau un unserm Hund vezählt un wollt ne die Plätz zeije, wo mir als Kinner de Winder hann hochlebe losse. Awwer anscheins gebt’s so Eispeter, wie mir des ware, heit nimmie. Nix los am Holzgaade odder im Wald, alles wie ausgestorb, ab un zu e vefrorener Spaziergänger. Sogaa in de Tschiffliker Dell doodie Hos. Wahrscheinlich leid’s dodran, dass mer heit enfach nimmie mi’m Schneewinder rechend un dann so baff is, wann’s doch emol schneid, dass mer de Schliede net find. Aller, do kennt ich aushelfe: Mei alder Rodler hängt mit roschdische Kufe noch immer im Keller un waad uff bessere Zeide.