Zweibrücken Do bische platt: De Paul hat sei Feierowendschöppche linkshännisch gedrunk

Wie mer neilich beim Feierowendschöppche zamme hocke, is mer glei was am Paul uffgefall. Er hat kee dumme Sprich gekloppt un still sei Bier gedrunk. Dodebei hat er sich annerschder vehall wie sunsch, hat sei Schoppe net enunner gekippt, sonnern noh jedem Schluck abgestellt. Em Bruno, unserm Wert, is des ah uffgefall, wie ich an seim belämmerde Gesicht gesiehn hab.

Noh enner Weil hab ich's nimmie ausgehall. Geht der's net guud, Paul, hab ich gefroot, hasche Kummer mit deim Monache? Er hat de Kopp geschiddelt: Jetzat lenk mich net ab, ich bin debei, mich umseschule. Saa des nochemol, hab ich mich gewunnert, hasch du eewe gesaat, du duusch dich umschule? De Paul hat mi'm Kopp genickt un gans langsam sei Glas uff die Thek gestellt: Genau. Hanner gesiehn, ihr zwee Dummköpp, wie ich mei Glas so sicher wie e Schlofwannler hingestellt hab?

Umdressierde Rechtsdodsche widder uff links umschule

Ei was is dann do Besunneres dran, dass du dei Feierowendschöppche uff die Thek stellsch un nix veschiddsch?, hat de Bruno gefroot. Jetzat bass'n uff, ihr Schofsnase, hat de Paul gesaat, ich bin doch urspringlich e Linkshänner gewest un hab in de Volksschul lerne misse, mit de recht Hand se schreibe. Ei des is mir genau so gang, hab ich gesaat, uns hann se domols mit Gewalt die link Hand ausgetribb. Ich wollt gaanimmie in die Schul gehe, so hat mich des genervt. Awwer do war nix se mache, die link Hand, so hat's geheeß, is die schlecht Hand, bloß die recht war erlaubt. So isses, hat de Paul gemennt, un jetzat bassen uff: Ich hab in de Zeidung geles, dass es do e Psycholoschin gebt, die umdressierde Rechtsdodsche widder uff links umschult. Des Fräche behaupt, dass mer uns domols all geischdisch vergewaldischd hätt un mir desweje seelische Krippel wäre. Awwer es gäb Hoffnung: Mer kennt sich ah noch im Alder uff die link Hand serick schule un e ordentlicher Mensch werre. Un dodemit fang ich jetzat langsam an: Ich drink seit heit Owend mei Schöppche linkshännisch.

Uff emol links gans daab

Mir hann e gansie Weil nix meh geredd un em Paul zugeguckt, wie er sei Schoppe mit de link Hand drinkt. Un, hab ich ne dann gefroot, fiehlsche dich jetzat besser? Ei wisse ner was, hat er sich gefreet, ich fiehl mich so, als käm ich vun enner lange Rees endlich heem. Herr Wirt, duun se mer die Gunschd un zappe mer dabber noch e Schöppche. De Bruno hat die Aue weit uffgeriss: Ei Paul, du machsch mer jo Angsch, wie reddsche dann uff emol! Komm ich spendier der de nächschde Schoppe, wann de ne widder rechts drinksch. Alla, hat de Paul gemennt, dann will ich mol net so sinn, Bruno, ich bin links ah schunn gans daab.