Zweibrücken Do bische platt: De Kappekönisch vum Kandon

Unser Kolumnist Wolfgang Ohler hat sich über die Jahre ein ganzes Sortiment an Kappen zugelegt – heute stellt er sie den RHEINPFALZ-Lesern vor.

Wann ich Besuch hab, bleibe die Leit als im Flur stehe un frooe: Wohnt do e Baseballmannschft in Unnermiet, Wolfgang? Sieh hann die viele Base-Caps entdeckt, die dort an de Garderob hänge. Nee, saa ich dann, die Kappe gehöre all mir, des is mei Kappe-Sammlung. Es sinn tatsächlich inzwische guud e Dutzend un meh, die ich mer in de Johre angeschafft hab, un e paar devunn will ich eich vorstelle: Do is e schwazzie Kapp mi’m Aufdruck FBI, die ich mer in New York kaaf hab. Bei uns nemmt die nimmand ernschd, awwer driwwe in de Staade macht se Indruck, die Leit krien e Schreck un gucke dabber uff die anner Seit.

Dann die grien Kapp mit de Schrift „Whispering Pine Ranch“: Des is e Andenke an die Ranch in Texas, wo mei Vadder e Johr lang als Prisoner of War ingesporr war. E ganz seltenes Stick is e Exemplar, wo vorne druff steht „Amondson for President“. Die hab ich vum Gene Amondson – meim Schwieschersohn seim Vadder, der 2009 fer die Prohibition Party tatsächlich in de USA Prädsidentschaftskandidat geje de Obama un de McCain gewest is, awwer knapp velor hat. Net se vegesse die Original-Baseball-Cap vun de Detroit Tigers, die ich bei em Match in dere ihrm Stadion uff’m Kopp gehat hab. Nee, die rood Kapp vun dem Glotzkopp mit de Uffschrift „Make America Great Again“ hab ich mer net zugeleet.

Beim „Gunndaach“ saan die Mütz vum Kopp geriss

Wie ich e Lauser war, hat’s bei uns noch kee Baseball-Kappe gebb. Dodefor hammer Schimütze gehat, ah wammer nie im Lewe Schi geloff sinn. Des ware Schneppekappe mit Ohreklappe, demit em im Winder die Ohrwatschel net abgefror sinn. Im Unnerschied zu de Buwe mit de Baseballkappe heit hammer domols, wammer zu jemand „Gunndach“ gesaat hann, die Mütz dabber vum Kopp geriss. Des hat mer schunn gelernt, bevor mer in die Schul komm is: Zieh beim Grieße die Kapp ab, hat mei Vadder gesaat, sunsch kennt mer menne, du hättsch Spatze drunner gefang! Er selber hat ah immer de Hut gezoo, des hat sich enfach so gehört.

Eenes Daas is mer was uffgefall: Saa mol, in de Wild-West-Filme, do zieht de John Wayne awwer nie de Hut, wanner enner Lady begeechent. Mei Vadder hat sich net err mache losse: Des kann der net, weil er die zwee Hänn braucht, um dabber sei Colts se ziehe. Ach so is des! Heitsedaas zieht außer mir kaum jemand de Hut beim Grieße, obwohl die Männer jo kee Colt hann. Awwer wer weeß, vielleicht hann se grad Spatze gefang. Vun meim Schwieschervadder hab ich zwee Kappe geerbt: e Eisebahnerdienschdkapp – denn er war e Bahner mit Leib un Seel – un sei Dochder, der ihr Mädchename is nämlich Kapp gewest. An Kappe hab ich also noch nie Mangel gehat.