Zweibrücker Mundart Die Fresswell aus em Küchekalenner

Es schenschde Geschenk von unserm Birgche aus Berlin war ah desjohr widder e Monatskalenner. Schunn seit Johre krien mir so e selbschgemachder Kalenner mit Foddos vun de ganz Familie, die zu de Johreszeit basse. Uff de meischde Bilder sieht mer unser Enkelcher, es Nova un de klenne John Wolf, wie se in die Welt naus lache, uff ihrm neije Fahrrädche fahre, ihr Gebordsdaa odder de Schulanfang feiere. Uff e paar Foddos sinn ah mir Alde druff, meischdens im Hinnergrund. Un es is immer scheenes Wedder uff denne Bildcher, es scheint immer die Sunn. Mir hann denne Kalenner an die Wand gehonk, direkt iwwer de Disch, an dem mir friehsticke. So hammer glei morjens e Grund, uns uff de Daa se freije.

Meh wie genunk Kalenner, awwer kaum noch Termine

A propos Kalenner: Schunn in de ledschde Woche vum alde Johr werrsche demit zugeschmiss. Beim Inkaafe kriesche enner geschenkt mit dolle Foddos vun Blumme un Kätzjer un Vechelcher. Beim Metzjer gebt’s enner mit Rezepte fer Schnitzel un Gulasch, beim Bäcker e Backkalenner. In de Zeidung leit enner fer die Termine, un al so weider. Vor allem Terminkalenner krie ich immer meh wie genunk. Un do is mer’s in denne erschde Woche vum neije Johr uffgefall: Ich hab kaum noch Termine, die ich mer merke muss.

Des hängt hauptsächlich mit dem dabbische Corona zamme. Nix is meh los, kee Neijohrsemfang, kee Prunksitzung, kee Generalversammlung un kee Vorstandstreffe, Konzerde un Theader Fehlanzeich, mei Kalenner hat nix meh se duun. Es bleibe noch e paar liddrische Gebordsdaa, ansunschde sinn die Seide öd un leer. Alla, hoffentlich kann ich wennischens ball e Impftermin indraan.

Ochseschwanzsupp un Napfkuche

Aus lauder Vezweiflung hab ich mer de alde Wochekalenner widder aus de Schublad genomm, denne ich schunn Johrzehnde uffheb: Denne hat mei Muddie wie alle Kunne fer’s Johr 1954 vun unserm Kaufmann Fritz Langhauser geschenkt kriet. Mei elfder Gebordsdaa hab ich in dem Johr gefeiert un denne Kalenner wahrscheinlich als Erinnerung an die Fußballweltmeeschderschaft uffgehob. Er war in erschder Linie e Küchekalenner und hat sich glei uff de erschd Seit an die „sehr verehrte Hausfrau“ gewend. Uff de Rickseit vun de erschd Januarwoch stehe Rezepde fer Ochseschwanzsupp, Schinkeröllcher un Napfkuche. Richdisch, des war domols de Höhepunkt vun de große Fresswell noh de machere Nohkriegsjohre.

Mei liewer Schollie, wann ich in dem Kalenner mit seine dausend Rezepte blädder, do laaft mer glei es Wasser im Mund zamme. Un weil ich’s zwar net weeß, awwer halt gern glaab, nemm ich an, dass in dem nahrhafde Johr 1954 mei Muddie, die e guudie Köchin gewest is, oft die Gerichde vun de Woch gekocht hat un ich desweje in denne zwölf Monade e halwer Meder gewachs bin.