Mundartkolumne: Do bische platt Desjohr hat an de Pingschde ebbes Wichdisches gefehlt

Es war werklich e scheenes Pingschde desjohr. Die Sunn hat geschiehn un es war trotzdem net so arisch heeß. Die Blumme hann geblieht, die Vechelcher gesung, die Krähe gekrisch. Awwer ebbes hat gefehlt, un desentweje war’s doch kee richdisches Pingschdfeschd, duud mer leed, Ihr Leit. Ihr wisse schunn, was ich menn: De Turnerjohrmarkt hat gefehlt!

Alla, es werd in de ledschde Johre nimmie ganz so doll gefeiert wie in meiner Kindheit, awwer er geheert zu de Pingschde wie de Has zu de Oschdere, un des seit iwwer hunnert Johr. Er is net es erschde Mol ausgefall, weil’s in de Kriegsjohre nimmande se Mut war, Reitschul se fahre un im Bierzelt sei Schoppe se drinke. Awwer vor emm Virus hat mer bisher noch nie de Schwanz ingezoo. Frieher net, wie die Markt noch uff’m Kleene Exe sei Heimat gehat hat, un ah noh 1977 net, als er uff de Platz an de Rennwies umgezoo is.

De Kleene Exe war e idealer Standort: viel Platz fer all die Bude, die Karussells, sogar die Achderbahn hat hin gebasst un e Riesebierzelt, un alles direkt in de Stadt. Zu sunschd hat er zu nix genitzt, der große Platz, wo frieher die Schwolleschees mit ihre Gail de Kriesch geprobt hann: im Summer staabisch wie die Wüste Gobi un ab Herbschd e riesischie Schlammpitz. Un desweje war’s ah e polidischie Schlammschlacht, wie mer des Senioreheim am Rand gebaut hat: Uijuijui, auwauwau, uff de Exe derf kee Bau, hann se im Stadtrat gekrisch, awwer dodefor kee Lideradurpreis kriet.

Un heit? Was is des e scheenes grienes Fleckche midde in unsrer Stadt worr! Mit Spielplätz am Wasser, Kledderfelse un em Bolzplatz, Skaderbahne mit alle Schigane, mit em Inselche im Bleecherbach un dausend Ende un Gäns.

Un jetzat hat de UBZ noch e schnuggelischer Spielplatz fer die ganz Klenne dezu gebaut, mit em Brunne, der richdisch Wasser bumt, mit dem mer wunnerbarer Batsch un sogaa Babberatsch mache kann. Wie ich des gesiehn hab, wär ich am liebschde widder e klenner Krutze gewest.

Un des muss ah emol gesaat werre: Die Fraue un Männer in ihre orangschene Klamodde schaffe vun morjens bis es dunkel werd, demit der ganse Platz uff Zack un sauber is un bleibt, sodass kenner sich meh vorstelle kann, wie der Exe frieher mol ausgesiehn hat. Also Hut ab vor der ganse Mannschaft, un losse eich bitte net vun denne dumme Dreckspatze entmudische, die sich halt net se benemme wisse un eich unneedisch Arwet mache.

Awwer eischendlich wollt ich doch ebbes gans Anneres schreibe? Richdisch, iwwer die Pingschde un de ausgefallne Turnerjohrmarkt. Alla, wann ich mer’s genau iwwerlee, is es ah ohne denne e scheenes Feschd gewest, newohr.