do bische platt De Napoleon hat „Arretez“ gekrisch

Mir Zweebricker sinn bescheidene Leit, schunn immer gewest un ah noch heit. Wie’s vor drei Woche in Frankreich Gedenkfeiere zum 200. Dodesdaa vum Napoleon gebb hat, hann se ah bei uns iwwerall de Finger gestreckt un wollde domols debei gewest sinn, wie er sich in unsrer Geeschend ausgedoobt hat. Die Kaschdeler hann dabber ihr Napoleonsbrunne geschruppt, bis er geglänzt hat, un die Saarbricker hädde ihr Städtche am liebschde in Bonapartbricke umgedaaft, weil de Kaiser dort im Mai 1812 vorbei galoppiert is, um sich anschließend mit de Russe se zanke. Un mir? Aller, de Paul un ich hann e paar Feierobendschöppcher uff de ald Korse gedrunk, ne hochlebe losse un die erschd Stroph vun de Marseillaise gesung, des war ah schunn alles. Dodebei hat de Napoleon genau gewisst, was er seine Leit aus Deux-Ponts se vedanke hat, un er hat sich ah net lumbe losse.

Em Napoleon sei Fayoum war aus Zweebricke

Es is jo net so, dass mir kee Denkmal fer ne hädde: Im Hauptfriedhof steht de Napoleonsteen, im Volksmund ah Franzosewacke genennt, der an die in de Napoleonsskriesche Gefallene aus Zweebricke un Umgeeschend erinnert. Awwer dodran denk ich jetzat gaanet, sonnern an denne Zweebricker Gaul, de Fayoum, uff dem de Bonaparte die Schlacht bei Wagram gewunn hat. Es war e besunnersch großes un dickes Perd, uff dem des klenne Kaiserche kaum se siehn war, un des war sei strategischer Triumph. Sei Feinde hann geglaabt, dass do e Ackergaul ohne Reider rumsteht un net druff geacht. Un so konnt de Napoleon unbemerkt sei Truppe lenke un’m Geeschner e Schnippche schlaan. Dodefor hat er sich dann ah revanchiert. Sei Landsleit hann nämlich inzwische nix Besseres se duun gehat, als unser herzogliches Geschdied se plindere un alle Gail noh Frankreich zum Perdsmetzjer se schaffe. Do hat de Napoleon dabber laut „Arretez!“ gekrisch, unser Geschdied zum Haras Premier Class ernennt un alle Gail widder redour geschickt. Un schunn desentweje muss unser Geschdied erhall bleibe. Ei wer kann dann schunn behaupte, dass er e kaiserliches Geschdied besitzt!

Aller, noh Waterloo war’s dann mit de Napoleonische Herrlichkeit se Enn, de Kaiser is uff de Insel Helena in Rente gang un dort vor 200 Johr geschdorb. Mer hat ne dann in Paris im Invalidedom beerdischt. Sei Schlachtross, de Fayoum, hat uff sei alde Daa sei Gnadeheu bei uns in Zweebricke fresse derfe. Noh seim Dood hat mer ne ausgeschdobbt un im Geschdied ausgeschdellt, bis er eenes Daas die Modde kriet hat. Umgekehrt wär’s nadierlich fer unser Stadt e größerie Attraktion gewest: de Fayoum im Invalidedom un de Napoleon bei uns … Do hädde mer de 200. Dodesdaa rischdisch gefeiert, trotz Corona. Awwer mer kann net alles hann. Unn wie gesaat: Mir Zweebricker sinn halt arisch bescheiden.