Zweibrücker Mundart 
De berihmdeschde Wannervochel
So peu à peu hat sich de Winder devunn gemacht, die Daache sinn widder länger, un die Krodde fange an se wannere. Die Diercher velosse ihr Winderquadier un marschiere in die Wiese, wo se sich’s es Johr iwwer gud gehe losse. Dezwische leit oft e Strooß, un werd ne zum Vehängnis.
Net bloß die Krodde gehe uff Wannerschaft, ah die Mensche. Des hängt domit zamme, dass mer zur Zeit kaum was anneres unnernemme kann: spaziere gehe odder halt wannere. Demit mer net lang iwwerleje muss, macht die Zeidung jed Woch e Vorschlaach: Mo soll’s in de Bliesgau gehe, mo ins Wallwer Daal. Un jetzat hoffe mer all, dass ah ball widder die Wannerhütte uff sinn, sunsch macht des enfach kee Spaß.
Es Wannere hat bei uns Tradition, un in de Fasanerie steht sogar e Skulpdur, die „Der Wanderer“ heeßt. Sie is’m berihmdeschde Zweebricker Wannervochel gewidmet, em Stanislaus, der Anfang vum 18. Johrhunnerd e Zeitlang in unsrer Stadt gewohnt hat. Vum Stani selbert zeit die Skulpdur allerdings nix, bloß sei Pilschermandel un vier Wannerschdecke stehe do im Wildrosegaade. Des macht awwer Sinn: Dodemit sinn sei Wannerunge durch Europa gemennt.
Schunn als junger Borsch is er von Pole aus iwwer Wien, Rom, Florenz bis noh Versailles gewanndert, wo er de Könisch Louis besucht hat. Na ja, was heeßt gewannert: Er hat wahrscheinlich die meischd Zeit bequem in de Kutsch gehockt, awwer mir wolle’s gelde losse.
Widder deheem in Pole is er dort Könisch worr, was awwer net lang guud gang is. Desweje die zwedd Wannerung nunner noh Bender in Moldawie, zu seim Schbezie Karl, Könisch vun Schwede un Herzoch vun Zweebricke. Dann die dritt Tour, jetzat unner falschem Name un als Pilscher verkleed iwwer Wien, Münche un Owwerauerbach zu uns noh Zweebricke.
Un de verde Schdecke, werre Ihr jetzat froon, wann is er dodemit gewannerd? Er is jo noh seiner Zweebricker Zeit nochmols vun Fronkreich aus noh Pole serick, awwer desmol per Schiff, un des zählt net. Also hat sich do de Gernot Waldner, der des Denkmal uffgestellt hat, am Enn vezählt? Nee, hat er net. Die ledschd Wannerung hat de Stanislaus im Sarsch gemacht: E polnischer General, der unnerm Napoleon gekämpft hat, hat des, was vun seim Könisch iwwrisch war, vun Nancy mit heem genomm. Dann sinn die Knoche iwwer Warschau zum Zar in St. Petersbursch gewannert un vun dort iwwer dausend Umweesche noh Krakau, wo se heit noch in de Krypta vun de Kathedral leije.
Die ledschd Wannerung war am anstrengenschde, un es werd vezählt, er hätt am Enn in enner Schuhschachdel Platz gehat, wann er’s ah nimmie gespürt hat, de arm Stani.
Jetzt froh ich mich nur noch: Wie komm ich jetzat bloß vun de Kroddewannerung uff’m Stani sei Schuhschachdel?