Do bische platt Bundesjuchendspiele – Diskriminierung vun de Lahmärsch?

Es is anscheins e Nadurgesetz, dass jeder Bleedsinn irschendwann in de Zeidung steht, hat de Paul gescholl. Seledschd hat doch enner velangt, dass die Bundesjuchendspiele abgeschafft werre. Des hätt nämlich mit Spaß am Sport iwwerhaupt nix se duun, im Geechedeel: Des wär Diskriminierung vun de Dollbatsche un Lahmärsch, die beim Renne, Huppse un Schmeiße net mitkomme. De reinschde Sozialdarwinismus uff’m Sportplatz wär des! Ei was saan ihr dann dodezu!?

De Bruno, unser Wert, hat iwwerleet: Ei dann mache mer doch glei Nächel mit Köpp! Die Leibeserziehung, wie’s bei uns geheeß hat, is doch bloß eens vun viele Schulfächer, in denne mer sich blamiere kann. Ich hab mer bei Madde immer viel schwerer geduun als wie uff de Rennbahn un bin bei de Geomedrie ah oft bei de Nixkönner gewest. Also fort mit alle Schulfächer un Schulnode, demit kenner vum Darwin diskriminierd werd.

De allerschenschde Schuldaa im ganze Johr

Ich hab denne zwee beigepflicht: Ich kann mich noch guud erinnere, wie mir uns allegar uff die die Bundesjuchendspiele gefreet hann, ah die Lahmärsch. Mir sinn doch viel lieber e Daa lang uff’m Platz hinner de Feschdhall rumgedoobt, als dass mer in de Schulbank bei Reli un Bio geschwitzt hann. Nadierlich hat jeder de Erschde un de Beschde sinn wolle, des war awwer beim Deitschaufsatz net annerschder. Un im Geechesatz zu de sunschdische Fächer hat’s uff’m Sportplatz ah e Teamgeischd gebb: Bei de Staffel un de Fußballspiele. Net se vegesse die Pause zwische de Wettkämpf, hat de Paul gemennt: Do hammer im Gras gehockt, unser Pausebrode gess un Feierowendschöppche gedrunk, uns Heihupper in die Hoor gesetzt un die Määde an de Zepp gezoo. Es Sportfeschd mit de Bundesjuchendspiele war immer de allerschenschde Schuldaa im ganze Johr. Aller, des mit de Schöppcher war vielleicht erschd e bissje späder.

Wo’s Siescher gebt, gebt’s ah Velierer, hat de Bruno gesaat, so geht’s halt mol zu im Leewe. Klar, mir ware schadefroh un hann gelacht, wann enner korz vorm Ziel uff die Nas gefall is; der is dann widder uffgestann un hat uns die Zung rausgestreckt. Un was ware mer stolz, wammer unser Urkunde kriet hann, ah wann e paar leer ausgang sinn. Ich hab mei Urkunde all uffgehob, hab ich mich erinnert. Ab 60 Punkte hat’s e Ehreurkund gebb, vorne druff de Bundesadler in Gold un unnerschribb vum Theodor Heuss. Mei beschdes Ergebnis ware 1958 stramme 64 Punkde, net geloo! Emol hat’s bloß zu enner Siecherurkund gelangt, die’s schunn mit 50 Pinktcher gebb hat. Des war bei de Winderspiele 1961 im Gerädekampf. Aller, fers Reck un de Barre war mei Athledebody halt net gebaut, un heit noch hab ich ab un zu Albdrääm vum Felschumschwung. Awwer trotzdem, hammer alle drei im Chor geruf, egal ob Summer odder Winder, uff die Bundesjuchendspiele hätte mir net vezichde wolle, mei lieber Herr Darwin.