Zweibrücker Mundart Do bische platt: Es Mona hat unnerm Bett zwee Säck Nudele vesteckelt

Mei Mona iwwerteibt mit allem, was se anstellt, hat de Paul de Kopp geschiddelt. Wie ich heit Morje de Kleedeschrank uffmach, is mer e Sack mit Reis uff de Kopp gefall. Ich hab's Monache gefroot, was des soll. Es hat gemennt, mir kennde uns in de nächschde Woche net alleen vun Nudele ernähre. Dann hat's verood, dass es unnerm Bett zwee Säck mit Spageddi un Makaroni vesteckelt hat. Un uff'm Kischeschrank hat's finfdausend Blatt Klobabier vestaut, alles bloß weje dem chinesische Virus. Alla, vier Kaschde Bier hab ich mer schunn in die Garaasch gestellt, mer kann jo nie wisse, awwer domit hat sich's. Wo mir doch eischentlich gaa kee Reis esse.

Jo, hat de Bruno gemennt, des Hamschdere wär e nadierlicher Instinkt vun jeder Hausfraa. Er hätt sei Fienche grad noch stoppe kenne, wie's am Telefon beim Kohlehänner e Fuhr Briggetts bestelle wollt; debei hätte se e Zentralheizung. Sei Fienche hätt mi'm uff Deiwel komm raus dischbediert, sie hätten im Fernsehe gesaat, es wär fer jeden christliche Haushalt Pflicht, minneschens e Steer Klobabier un zwee Zentnder Brand se horde.

Nohm Kriesch war de Hunger e Virus

Wahrscheinlich is des so, dass mir Mensche jetzat die Feldhamschder ersetze, wo die vum Aussterbe bedroht sinn, hab ich gesaat. Un wesweje sinn se vun de Baure beinächschd ausgerott worr? Weil se's ah iwwertreibe un in ihrm Bau viel meh Vorrat anleje, wie se brauche. Des misse mer unsere Fraue halt deitlich saan, demit se mit dem Unsinn uffhöre. Wer soll die ganze Nudele und denne viele Reis esse, wann in zwee Woche alles widder normal laaft.

Weil ich de Älschde an de Thek bin, hab ich ne vun denne schlechde Zeide nohm Kriesch vezählt. Knapp drei Johr war ich, wie ich uff Hamschdertour los bin. Mei Vadder un mei Muddie hann mitgederft, weil se unser Handwaan hann ziehe misse. Der war immer voll belaad: mi'm guude Debbisch un'm Oba seim Korbsessel, mit meiner Muddi ihrm Windermandel un e paar Schnierschuh, mit meim Schockelgaul un e paar Sofakisse, so sinn mir losgezoo – ich wie e Feldherr owwedruff uff dem ganze Plunder. Mir sinn in Richdung Middelbach un Hengschbach marschiert, dort hat mei Vadder e Paar Baurehöf gekennt. Un dann is gefuggert worr, bis mer die Sache geje Eier un Mehl, Grumbeere un Gemies, Obst un Speck ingetauscht gehat hann. Wann die Baure uns vum Hof jaan wollde, hab ich uff Kommando laut losgehailt, bis die Bäuerin Mitleid kriet hat. So hab ich's geschafft, dass mir domols net vehungert sinn. Denn des war de eensische Virus, der uns zugesetzt hat: de Hunger.

Ei weesche was, hat de Paul gemennt, komm mit deim Handwäänche vorbei, mei Mona gebt eich bestimmt e Sack Nudele ab.