Mundart-Kolumne: Do bische platt 
Wesweje es Mona seim Paul bloß noch Grienzeich uff de Disch bringt
Schdimmt des, hat de Bruno bei unserm ledschde Feierowendschöppche de Paul gefroot, schdimmt des, dass du alder Esel widder mi’m Jogge angefang hasch? Hasch du net vezählt, du kämsch weje deine schdracke Knie kaum noch die Treppe enuff? Des schdimmt un ah widder net, hat de Paul gebrummelt. Mei Monaschätzje hat mich iwweredd, bei seiner neije Jogging-Grupp mitsemache, demit ich e paar Punde loswerr. Entwedder Jogge, hat’s gesaat, odder e Monat lang Rohkoschd.
Aller, hab ich gemennt, do is der die Entscheidung net schwer gefall, hasche schunn Muschkelkader? Nee, hat de Paul de Kopp geschiddelt, dodevunn kriesche kee Muschkelkader. Was die jetzat treibe, des nennt sich „Slow Jogging“. Do werd ganz langsam mit klenne Schrittcher gerennt; des heeßt, mer kann des eischentlich nimmie renne heeße, es is meh so e Schleiche un Schdolbere, halt mol widder so e neimodischer Krom aus Japan. Senächschd hab ich mer gesaad, aller, do werrsche net so schnell mied, un mei schdracke Knie krien gaanet mit, dass ich mich beweesche duu. Wie uns dann abber so e Oba mit seim Rollador iwwerholt hat, hab ich dabber uffgehört. Ei ich mach mich doch net zum Narre!
Ei bassen uff, hat de Bruno gesaat, mei Fienche geht jetzat in e Seniorekurs, der nennt sich „Fundamental Fitness“. Ihr werres net glaawe: Do misse die Alde uff Hänn un Fieß dorch die Geschend krawwele, Borzelbaam schlaan, sich rumrolze un hupse wie junge Hunn. Mit annere Worde: Wie mer’s als Kinner gemacht hann. Des dääd die Zelle im Hernkaschde anreesche. Die heidisch Generation hat’s jo mol viel schwerer wie mir, weil die Kinnercher nimmie rischdisch schbiele, so wie mir frieher, hat de Paul iwwerleet. Was sinn mir gegrawwelt, gehupst un gewetzt de ganse Daa iwwer.
Die neischd Mod is awwer, hab ich mich gemeld, dass mer sich e Personal Trainer leischd, der sich ganz alleen um dich kimmerd un dich uff Trab halt. Der koschd nadierlich e Schdang Geld. Ich hab allerdings enner gefunn, der machd des ganz umsunschd. Saa bloß, hann die zwee annere geschdaunt. Ei bassen uff, hab ich gesaat, mei Personal Trainer, des is die Schwerkraft. Mir werre jo im Alder immer dabbischer, un dauernd losse mer was falle, de Schlissel, de Kuli, die Brill. Die Schwerkraft zieht’s dann weit weg bis nunner uff de Boddem, mir misse uns bicke, um’s uffsehebe. Mach mol am Daa hunnerd Kniebeische, un du bleibsch fit.
Awwer saa mol, Paul, is mir ingefall, wo du beim „Slow Jogging“ gekinnischd hasch, kriesche jetzat vun deim Monache bloß noch Grienzeich uff de Disch? Gut, dass de mich dran erinnerschd, hat er zur Antwort gebb, Bruno, mach mer mol dabber e Deller Brodkrumbiere mit em ordentliche Schnitzel dezu.