Zweibrücker Mundart Wesweje die Gäns un die Karpfe minanner schdreide

Mir hann mol widder Besuch aus Berlin gehat, unser Dochder Birge un die zwee Enkelcher. Jetzat hat mer sich mol grad e halwes Johr net gesiehn un kann’s kaum glaawe, wie die zwee Grutze sich veännert hann.

Es Novache is mit ihre elf Johr schun e klennes Dämche, de John mit seine siwwe immer noch de wilde Lauser, awwer e Kopp größer un wilder. Do kenne mir Alde net mitredde: Mir wachse nimmie, im Geechedeel, un veännere uns bloß noch alle zeh Johr, wann iwwerhaupt.

Es hat zwee Daa gedauert, un die zwee Berlinercher hann angefang, pälzisch se schwätze. Am Sunndaa simmer all minanner in die Allee schbaziere gang, un de John hat’s Romi, unser Hundche, fiehre derfe. Am Uboot neewe de Schließ hab ich de Kinner zum xde Mol die Geschicht vum Erfinder Willem Bauer vezähle misse un wie er mit seim Boot in de Kieler Bucht abgesoff is. Dann hab ich ne veroot, dass Zweebricke die reinschd Erfinderstadt is, hab vum Dingler seiner Druckmaschin vezählt, vum Kreiselkompass un vun de Konservedos, die sich’m Herzoch Christian sei Leibkoch ausgedenkt hat. Un jetzat schberre die Ohre uff, demit ner was lerne, hab ich gesaat: Mir hann sogaa die Demokratie un die Pressefreiheit erfunn, driwwe in Buwehause. Sie hann’s net glaawe wolle, un ich hab ne die Geschicht vum Pressverein un vum Hambacher Feschd vezählt.

Die Gäns un Ende hann de Karpfe die Brotbrocke dabber weggeschnappt

Inzwische ware mer im Rosegaade ankomm un hann angefang, die Fisch im Weiher mit Brot se fiedere. Des hat denne zwee Enkelcher meh imponiert wie em Bauer sei Brandtaucher un em Dingler sei Kniepress. Es hat net lang gedauert, un die Gäns un Ende hann de Karpfe die Brotbrocke dabber weggeschnappt. Des misse ner veschdehe, hab ich erklärt, die Ende un die Karpfe sinn seit jeher Konkurrende, un die Fisch ziehe debei immer de Kerzere. Des hängt mit de Weihnachde zamme: Die Gäns un Endcher komme schunn am erschde Feierdaa uff de Disch, un die Karpfe misse bis Silveschder waade. De John hat’s geglaabt, die Nova hat’s Köppche geschiddelt, un vun de Birge hab ich gescholl kriet.

Anschließend simmer niwwer ans Geschdiet un hann de Island-Ponys zugeguckt. Des hat de Kinnercher noch besser gefall wie die Fisch un die Ende. Ich hab nadierlich net vegess se vezähle, dass de Kaiser Napoleon uff’m Zwebbricker Gaul all sei Schlachde gewunn hat. Uff’m Heemweesch hat mich de Klenn gefroot: Oba, wieso weeschd dann du des alles? Ei bass uff, hab ich geantwort, des kommt devunn, weil eier Oba so gescheit is. Dann hab ich die zwee Enkelcher gefroot: Mol ehrlich, wo gefallt’s eich besser, in Berlin odder bei mir in Zweebricke? Do hann se im Chor geruf: Ei in Berlin, Oba!