Do bische (Vinyl)platt 
Wann de Gerd Fitz gelispelt hat, war e nei Stahlnodel fällisch
Ledschd Johr hab ich eich vezählt, wie ich frieher die Schallpladde gesammelt hab. Grad hab ich widder dran denke misse, wie ich geles hab, dass jed Johr de dritte Samschdaa im April de Schallplatt gewidmet werd. In dem Atikel hat sich alles um die Vinyl-Pladde gedreht, vum alde Schelllack war net die Redd. Aller, die schwarze Scheibe mit de 78 Umdrehunge pro Minudd sinn die Saurier unner de Schallpladde, während die Vinylscheibe langsam widder in Mode komme. Desweje will ich ah desjohr was dezu schreibe.
Nadierlich is do e großie Portion Nostalschie debei, wann ich selber mol widder die alde Pladdekamerade ufflee un mich an de analoche Musik frei. Schunn die Wörder sinn Musik in meine Ohre: die Pladdehüll, mit der’s anfangt, de Pladdedeller, um denne sich alles dreht, de Tonarm, der die Pladdenodel ganz sanft in die Rille vun de Schallplatt tunkt, de Kratzer uff de Scheib, der die Nodel hupse losst. Un dann noch de Umweech iwwers Radio, weil’s Grammophon kee eischener Vestärker gehat hat. Es braucht halt e ganzie Prozedur, e Art Vorspiel, bis de ebbes hörsch, un des macht de Reiz vun de Schallplatt aus. Dodefor hann die junge Leit heit kee Geduld meh, sie tippe e paar Nummere in ihr Smartphon un schunn kommt de Rap gestreamt. Nee, des is nix fer mich.
Ich hab jo sogar noch mit de schwarze Scheibe handiert, wie se mit Stahlnodle abgespielt worr sinn. Wann de Gerd Fitz denne Schlacher „Uff de Piazza vun Milano“ gesung (aller, uff hochdeitsch nadierlich) un angefang hat se lispele: „Piassssa“; do hab ich gewisst, ich muss die Nodel wechsle. Des ganze Zeremoniell hat sich so abgespielt:
Wer die Schallplatt spiele will,
holt se dabber aus de Hüll.
Blost se’erscht de Staab eweg,
kriet debei e großer Schreck:
Ei verflixt un Dunnerschlack,
e neier Kratzer dief im Lack.
Egal, die Platt glei uff de Deller,
un der dreht sich immer schneller,
dreht die Platt, was will se mache,
dreht mit achdesiebzich Sache.
Jetz de Tonarm dabber druff,
mit viel Schwung un ohne Knuff,
die Abspielnodel in die Rill,
demit de Schelllack spiele will.
Es kratzt e bissje, awwer dann
muss de Tonabnehmer ran,
bringt die Musik, net geloo,
dorchs Kabel glei ins Radio,
in de Lautsprecher enin,
ohne denne macht’s kee Sinn.
Awwer jetzat kannsch ne höre,
de Schelllack singt,
loss dich net störe.
De ledschde Pladdelade mit Vinyl hat bei uns vor Johre zugemacht, jetzat musche halt im Internet bestelle. Awwer Internet und digital basst enfach net zu de analoch Schallplatt. Wissener ah, wesweje mer die ana-loch nennt? Ei weil se e Loch in de Midde hat. Aller, des hat jetzat noch sinn misse.