Mundartkolumne: do bische platt 
Vorschlaach: Wer mi’m Rad in die Schul kommt, kriet e Enser in Sport
Die Radfahrer stehn alleweil widder in de Zeidung. Beim Stadtradele hann faschd dausend mitgemacht, des war enfach Spitze. Bei enner Umfraach vun de RHEINPFALZ bei de Stadtvewaldunge in de Palz schneid Zweebricke degeje net guud ab, was die Radlerfreindlichkeit angeht. Also, des hall ich fer ungerecht.
Es hängt nämlich dodemit zamme, dass mer die Situation in de Stroße un vor allem an de Kreizunge bewert hat. Dodebei werd iwwersiehn, dass bei uns die Radfahrer e besunnerer Luxus hann: In unsrer Allee un Spazierweesche is es möchlich, bis in die Stadtmidde se radle un driwwer enaus, ohne dass emm die Audos in die Quer komme: vun Auerbach iwwer de Roseweesch, die Allee an de Rennwies, unner de Saarlandstroß dorch, die Gestütsallee lang, am Goetheplatz vorbei, dorch die Kechdeallee in de Schillerstroß, am Wichernhaus vorbei un die Bach entlang bis noh Ernschdwiller. Un alles zu ebener Erd, ohne Hiwwel un Buckel wie in Bermesens, wo de bloß mi’m Mountain-Bike vorwärts kommsch. Ei wo gebt’s dann so ebbes noch!
Un e ganz beliebdie Streck is de Guldeweesch, weil dort es Radfahre vebodd is. Awwer ah do is unser Stadtvewaldung arisch radlerfreindlich un kommt net uff die Idee, mol se kontrolliere un e paar Prodscher se vedeele. Sogaa in de Fußgängerzon, wo Räder jo ah vebodd sinn, drickt se sämtliche Aue zu, so fahrradfreindlich sinn mir. In de Allee wollde se sogar e extranie Plasdikrennbahn inbaue, do drauß werd jetzat allerdings nix.
Was meiner Meinung noh ganz wichdisch wär: Mer muss schunn die Kinner zum Radfahre erziehe. Die Schule zum Beispiel missde sich was infalle losse: Wer mi’m Rad in die Schul kommt, kriet mol glei e Enser in Sport. Zu meiner Schulzeit war des net nödisch, im Geeschedeel: Im Gymnasium sinn die Fahrradstänner im Schulhof streng vedeelt worr: Nur wemm sei Schulweesch minneschens zwee Kilomeder lang gewest is, hat e Radstänner zugewies kriet. Bei mir hann e paar Sandimeder gefehlt. Es hat ah nix genitzt, dass ich angebott hab, e Umweesch iwwer Auerbach se fahre. Erschd als Primaner hat mir des Privileg zugestann, mi’m Rad in die Schul se komme.
In de erschde Johre nohm Kriesch hann sich mei Vadder, mei Muddie, die Oma un ich e Familierad deele misse. Es hat sich um e Vorkriegs-NSU-Damerad gehanneld, mit dem mir all serecht komm sinn, vor allem ich. Wie ich mit acht es erschde mol alleen losgeradelt bin, war des die ganz große Freiheit. Es hat noch kee Amble gebb, kee Zebrastreife, kee Inbahnstroß, kee Fußgängerzon, kaum Audos un vor allem kee Geschwindischkeetsbegrenzung. Un so hat die Stroß mir geheert, un ich bin ich mit Sticker achzisch Sache quer durch die Stadt gesaust, un erschd die Franzmänner mit irm Schlaachbaum am Kaplaneihof hann mich uffhalle kenne.
