Zweibrücker Mundart Unser Schbadziergang iwwer de Friedhof werd mit de Zeit immer länger

Ihr Kinner, jetzat hammer schunn widder de dunkle Monat November, die Winderzeit un de Herbschdnewwel, noh finf am Nohmiddaa werd’s zabbeduschder, un de Bruno muss die Lamb iwwer de Thek anmache, sunsch finne mer unser Feierowendschöppche net. Mer werd ganz driebsinnisch, un mir schdoße mi’m erschde Schobbe uff die an, die nimmie do sinn, de Schorsch, de Krischan un all die annere. Un dann falle nadierlich die dumme Schbrich: Es werd kenner vegess; es Alder is e Krankheet, awer’s geht Gott sei Dank vorbei; jeder Mensch muss schderwe, vielleicht sogar ich. Am Enn zitier ich de Seneca: Was kimmert uns de Dood, wann mir sinn, is er net, un wann er is, sinn mir net.

Dodemit hat er bloß Recht, was de eischene Dood betrefft, de olle Seneca, net denne vun unsre Liebschde un Freinde, der kimmert uns schunn. Desweje gehe mer jetzat ah iwwer de Friedhof, mei liewie Fraa un ich, bleibe an unsre Gräber stehe un sinn e Weilche traurisch un still. Mit de Johre werd die Rout immer länger. Mir fange beim Grab vun de Schwierleit an, mache e Abstecher zum Werner vun Blon, der schunn iwwer e Johrzehnt do leit, dann in die anner Richdung zu meim alde Kumpel Elef. Am längschde bleib ich am Grab vun meim Schulfreind Karlche Profit stehe, dem sei Lewe schunn mit achzeh zu Enn war. Dann mei Familiegrab mit meiner Muddie, meim Vadder un de Oma Friedel.

Manchmol loss ich mer e bissje meh Zeid un besuch die alde hisdorische Gräber. Unser Hauptfriedhof hat jo schunn zum Enn vun de Herzochzeit de alde Stadtfriedhof in de Näh vun de Alexanderskerch abglöst, sodass sich dort die ganz Prominez vun de ledschde Johrhunnerde e Schdelldichein gebt. Do ruhe die Familie Mannlich, Hofenfels un Esebeck, de Advokat Kullmann, die Induschdriebosse Ipser, Heck un Schwinn, mei Richderkolleesch Ludwig Molitor un unser erschder OB nohm Kriesch, de Ignaz Roth.

Dann mach ich e Abstecher nuff zum Judefriedhof, der 1893 dezu komm is. Die Nazis hann e halwes Johrhunnerd schbäder des Friedhofsgetto geschleift, un die Grabsteen sollde beim Stroßebau vebuddelt werre. Beim Steinmetz Hafner sinn se zwischegelaachert un vegess worr. De Hafner hat se all bis nohm Kriesch uffbewahrt, sodass mer se hat widder heembringe kenne. Manchmol hat die Vegesslichkeet ah ihr Gudes.

Un zum Schluss bleib ich e Weilche am Grab vum Fräulein vun Fürstenwerder stehe, des 1801 mit grad mol finfezwansisch gestorb is: an gebrochenem Herz, weil se Auezeichin war, wie ihr Schätzje, e stolzer Schwolleschee, mitsamt seim Gaul in de Rhein geschderzt un vesoff is. Un wann ich do driwwer nohdenk, duud mir mei Herz ah e kleen bissje weh.