Do bische platt 
Saarlännischie Fangprämie fer fahneflichdische Pälzer
Uff die Bääm, die Pälzer komme! So hann se sich frieher iwwer uns luschdisch gemacht, die Saarlänner. Die Zeide sinn jetzat endgillisch vorbei. Sie denke nämlich im Draam net dran se komme, die Pälzer, un des is denne driwwe gar net so recht. Desweje soll’s jetzat so e Art Fangprämie odder Schmerzensgeld fer fahneflichdische Pälzer gebbe, je nohdemm, vun weller Seit mer’s betracht.
Die nei Minischderpräsidentin, es Anke Rehlinger, will mit so enner Prämie uns Pälzer an die Saar locke, weil’s dort net genunk gescheide un fleißische Leit gebt, un desentweje es Saarland uff die Dauer alleen mit Saarlänner net iwwerlebe kann. Die Belohnung kriet mer, wann mir aus Zweebricke odder Landstuhl zum Beispiel uns in Dingwert odder Neinkeje uff Dauer ansiedle.
Kee Acker in Sulzbach
Die Idee is so nei net. Im 19. Johrhunnerd hann die Pioniere in de USA, die mit ihrm Planwaache noh Weschde gezoh sinn, vun de Reschierung in Washington e großes Stick Land fer e Ranch odder e Farm geschenkt kriet. Unner denne Einwannerer ware e großie Meng aus de Palz. Eischentlich war des e Kuhhannel, weil des Land nämlich de Indianer gehört hat, un die hat mer nadierlich net gefroot, ob se demit investann sinn.
So soll’s im Saarland net laafe, mer kriet also kee Acker in Sulzbach odder Aldewald, sonnern werd mit Geld belohnt. Wieviel mer uff die Hand gezahlt kriet, steht noch net feschd, die Redd is vun Sticker zeh Euro pro Person. Vielleicht is die Entschädigung ah gestaffelt: Wann mer bloß bis Bierbach kommt, gebt’s wennischer als wann mer sich bis noh Wadern odder Lebach traut.
E Anwerbestell wie bei de Fremdeleschion?
Jetzat bin ich gespannt, ob dann widder wie frieher in de Franzosezeit, wo’s in de Fruchtmarktstroß e Anwerbestell fer die Fremdeleschion gebb hat, so e Amt fer saarlandmudische Inwannerer in unsrer Stadt ingerischt werd. Vielleicht macht’s es Anke awwer wie die Zeuche Jehovas, klingelt an unsrer Hausdier un vesprecht uns Pälzer es Paradies driwwe an de Saar. Im gelobte Ländche, wo Milch un Maggi fließt. Aller, mir werre’s siehn.
In meiner Famlie war’s grad umgekehrt. Die Zweebricker hann mei Urgroßvadder Hermann, der Berschmann an de Grub Mellin un in seiner Freizeit Rosezichder war, im Summer 1914 zu de Eröffnung vum Rosarium gelockt, wie’s domols geheeß hat. Er war so begeischdert, dass er im Johr 1922, glei wie er in Rende war, sich e Haus in de Näh vum Rosegaade kaaf hat un mit de Anna, seiner Fraa, riwwer ins Reich gezoo is. Do hat’s kee Prämie gebraucht, die wunnerscheene Rose ware ’m Belohnung genunk. Un so kommt’s, dass ich heit noch in dem alde Kaschde in de Näh vum Haltepunkt Rosegaade hock un grad eewe mei Beitraach iwwer’m Anke Rehlinger sei Entschädischung fer leichtsinnische Pälzer schreib.