Mundart-Kolumne: Do bische platt Mir Alde sinn immer die Beschissene

De Paul wollt sich gaanimmie beruhische. Ei is dann die ganz Welt verickt, hat er gekrisch un mit de Fauschd uff die Thek gehau, dass die Feierowendschöppcher gehubst sinn. Als ob mir Alde net gestrooft genunk sinn! Dann hat er verood, was ne so in Wut gebrung hat. Sei Audovesicherung hat’m geschribb, dass se die Prämie erhöhe missde, weil er jetzat iwwer siebzisch wär. Ei ich fahr doch heit net schlechder Audo wie vor em Johr. Mir Alde mache kee illegale Stroßerenne un fahre kee annere Leit dood. Un mei ledschder Unfall is längschd vejährt, un eischentlich war do der Lahmarsch dran schuld, der vor mer her geschlich is wie e Schneck, sodass ich’m hinnedruff gefahr bin. Fehlt bloß, dass se mer de Fiehererschein abnemme wolle, weil ich zum Fahre zu dusslisch wär. Nee, des do loss ich mer net biede!

Hasch recht, hat de Bruno gemennt, unser Wert, mir Alde sinn in jeder Beziehung die Beschissene. Wann ich mi’m Rad fahr, nemm ich meim Fienche sei Damerad, weil ich bei meim es Been nimmie iwwer die Stang krie. Un ich kaaf mer bloß noch Schuh, in die ich ninschlubbe kann, hab ich mich gemeld, demit ich mich nimmie bicke muss. Wann ich mer die Zeewenäschel schneid, hab ich drei Daa lang Muschkelkader. Un wann mer ebbes nunner fallt, waad ich ab, bis genunk uff’m Bodde leit, demit sich’s Uffhebe lohnt.

Ei jo, hat de Paul als weider gescholl, debei sinn mir Alde doch fer die Junge die reinschde Vorbilder: Mir schreibe kee Hassmails un mache im Internet kee Schitstorm, weil mer net wisse, wie des geht. Mir kleewe uns net uff de Stroß feschd, klobbe uns net mit de Bolizei un geje brav zu de Wahl, wann’s mol widder so weit is. Mir komme sogaa noch jed Johr uffs Perderenne un an de Weihnachde in die Kerch, do solle sich die Junge mol e Scheibche abschneide.

Jo, mir Alde sinn arm dran, hab ich gemennt, enner Troschd is, dass es rumgeht, es Alder, awwer do kannsche lang waade. Ich weeß noch genau, wie es erschde Mol so e junges Frääche mir im Omnibus sei Sitzplatz angebott hat, un debei wollt ich grad mi’m flirde. Un mich hat so e Lauser am Arm genumm un wollt mer iwwer die Stroß helfe, hat de Bruno gesaar, dodebei wollt ich doch gaanet eniwwer. Wennischens kriet mer bei dir e Senioredeller, Bruno, bleed is halt bloß, dass mer mit seine schlechde Zähn nimmie alles beiße kann. Ei so e paar Vordeele hat mer jo schunn, hab ich gemennt, uff mei Rendnerausweis krie ich faschd iwwerall Ermäßischung. Ihr hann gut redde, hat de Paul gescholl. Mei Vesicherung is do stur. Ei die Brieder zeich ich an weje Aldersdiskriminierung.