Do bische platt Mi’m John Wayne un mi’m Gary Cooper drink ich als e Whiskey

Du kannsch so alt werre wie de Methusalem, du lernsch nie aus un machsch immer widder neie Erfahrunge. So wie ich vor zwee Woche.

Do hann se doch werklich vesucht, mei Gebordsdaa se gendere, wie des jetzat iwwerall Mode werd: Ich hab unner annerem e großer Strauß rode Rose geschenkt kriet un e Flasch Eierlikör. Was soll mer dodezu saan! Aller, es hat ah veninfdische Geschenke gebb, des is bei so’m alde Zausel wie mir jo ah kee Kunschd. Wie hat schunn de Wilhelm Busch gemennt: Rotwein is fer alde Knabe enne vun de guude Gabe. Die meischde Freinde hann sich dodran gehall, e paar Flächelcher Weißwein ware ah net vekehrt. Un die ganz alde Freinde hammer die Freed gemacht un mer e Whiskey geschenkt. Un dodezu hat dann gebasst, dass se im Fernsehe e paar Daa späder denne alde Western mi’m Burt Lancaster gezeit hann „Der Mann aus Kentucky“.

Aller, des muss ich eich jetzat erkläre. Ihr derfe net denke, dass ich e Saufnas bin. So e Flasch Whiskey halt bei mir schunn e paar Daa. Ich drink nämlich e Gläsje devunn nur zu besunnere Anläss, nämlich wann’s im Fernsehe so e alder Wild-West-Film gebt. Wann dann de John Wayne odder de Gary Cooper im Saloon an die Thek schlorpst un sich e Whiskey bestellt, dann schenk ich mir deheem in meim Wohzimmer ah so e Cowboy-Schnäpse in, un mir stoße minanner an, de John, de Gary un ich. Un so hab ich’s dann ah mit dem Mann aus Kentucky gemacht, zwee odder drei Whiskey gekippt, so genau weeß ich des nimmie.

De Eierlikör war mei allererschder alkoholischer Drink

So viel zum Whiskey. Jetzat muss ich awwer zugebbe, dass ich mich ah iwwer denne Gender-Eierlikör gefreet hab. Geärchert hat mich bloß, dass des jetzat Egg Flip heeßt, es muss halt heitsedaas alles e englischer Name hann. Geschenkt hat mer denne Likör jemande, der mich arisch guud kennt. De Eierlikör war nämlich mei allererschder alkoholischer Drink, lang vorm Whiskey.

Die Geschicht geht so: Wann mei Muddie als am Sunndaa ihr Kaffeekränzje gehat hat, dann hann die Dame zum Abschluss all e Eierlikörche gesiffelt, denne mei Muddie selbert gemacht hat. Anschließend hat se dann die Likörgläsjer in die Kisch gedraa un in de Spielsteen gestellt, wie sich des geheert. Dodruff hab ich schunn galauert. Kaum war ich mit denne Gläsjer alleen, hab ich enns nohm annere ausgeschleckt. Bei so finf, sechs Gläsjer is do schunn noch was zammekomm. Gestört hann mich bloß die Lippestiftspure am Rand, awwer was will mer mache. So bin ich zu'm heemliche Eierlikörsäufer worr. Un desweje hab ich mir jetzat ah denne Egg Flip ganz besunnersch schmecke losse un hab mich an dem Gendere net gestört.