Zweibrücker Mundart 
Mei Oba hat’s in London net ausgehall
Aller guude Dinge sinn drei, heeßt’s, wenn enner nohm zwedde Mol net uffhöre kann. Un zu denne gehör jetzat ah ich, weil ich zum dritte Mol iwwer die Pälzer Auswannerer schreib. Anfange will ich mit meim Großvadder Kallemann, der in Gondrexange 1879 gebor is. Noch vor de Johrhunnerdwend is die ganz Familie iwwer die Grenz ausgerechend noh Bermesens gezoo. Meim Großvadder un seine Geschwisder hat’s dort awwer net gefall, was ich ne net vedenke kann. Desweje hann se sich entschloss aussewannere, so wie viel junge Pälzer domols.
Die ensisch Schwester hat de weitschde Weesch genomm noh Neuseeland. Zwee Brieder sinn iwwer de große Teich noh Ameriga. Mei Oba un sei Bruder Eischeen hann’s bloß bis England geschafft. Die meischde junge Auswannerer aus de Palz hann ball irschendwie ihr Glick gemacht, wann’s ah bloß e klennes Glick gewest is. So ah die Geschwisder vun meim Oba, die all in ihrer neije Heimat e Familie gegrind hann; bloß er selbert, de Kallemann, hat’s in London net ausgehall un is widder heem gefahr. In Bermesens hat er ah net lewe wolle, is nunner ins scheene Zweebricke gezoo un hat beim Langermann geschafft. Dodefor bin ich’m heit noch dankbar, sunsch wär ich am Enn noch e Bermesenser worr. Dankbar ware mer all minanner seine Geschwischder, die nohm Kriesch Fresspakede mit Schmalz, Nudele, Corned Beef un Schokolad geschickt hann.
Die Pälzer sinn schunn immer gern in die weid Welt gezoo, vor allem in de schlechde Zeide. Dodran hat mich vor einischer Zeit ah mei alder Schulfreind Lutz erinnerd, der ah ausgewannerd is, allerdings bloß noh Norddeitschland. Er hat mer e Biechelche geschickt mit dem Tiddel „Kurze Geschichte der pfälzischen Flüchtlinge“. Geschribb hat’s nimmand annerschder wie de Daniel Defoe, der jo mit seim Buch „Robinson Crusoe“ weltberiehmt worr is. Dass er sich als Journalischd un Polidiker fer die Pälzer ingesetzt hat, des war mir nei.
Un wie er sich fer die „poor Palatines“ engagiert hat, die anfangs vum 18. Johrhunnerd zu Dausende iwwer de Kanal noh England komm sinn, völlisch middellos un halb vehungert. Die Bridde hann kee so gude Erfahrunge mit de Pälzer gehat. De Palzgraf un Kurferschd Friedrich V. hat hunnerd Johr vorher die Lisbet Stuart geheirat, die Dochder vum englische Könisch Jakob, un war als de Winderkönisch vun Böhme schwer uff die Nas gefall. Desweje wollde se mit denne Hungerleider aus de Palz nix se duun hann. De Daniel hat awwer kee Ruh gebb, bis die Könischin Anne die ganz pälzisch Baggaasch dann doch uffgenomm hat. Mi’m Freidaa, em dunkelhäudische Kumpan vum Robinson, soll de Daniel Defoe dann in seim Buch de arme Pälzer Inwannerer e liderarisches Denkmal gesetzt hann.