Zweibrücker Mundart 
In de vordersch Reih hann’s bloß die Streber ausgehall
Die Wissenschaftler wisse aweil nimmie, wie se sich die Zeit vedreibe solle, un komme uff die komischde Gedanke. So hat e Professorin vun de Uni Leipzisch iwwer „das Phänomen der Homophilie in Klassenbänken“ geforscht. Mir is es genau so gang wie eich: Ich hab erschd mol nohlese misse, was domit gemennt is.
Ei bassen uff: Des gescheit Fräche hat driwwer simeliert, wie mer es Sozialvehalde vun Schieler dodorch beeinflusse kann, dass mer se noh beschdimmde Kriterie zammesetzt. Zu meiner Schulzeit hätt se des glei in de Babierkorb schmeiße kenne, weil mir uns gehockt hann, wie mer wollde. Also mehrschdendeels hann Freinde newenanner gesess, was sunsch. Mer hat nadierlich schunn iwwerleed, in wellie Reih mer sich hockt. Ganz vorne war’s ungemiedlich, so nah beim Lehrer, do hann’s bloß die Streber ausgehall. Ganz hinne war net ginschdisch, do hann die Lehrer besunnersch uffgebasst, dass mer kee Unfuch treibt. Am beschde also in de Midd, do is mer am wennischde uffgefall. Ich hab mei Platz gern glei am Fenschder gehat, do hat mer nausgucke kenne, wann mer sich gelangweilt hat, un des war jo net selden de Fall.
Es Lineal als Gidarr
Manchmol hat mer sei Nachbar ah aus ganz annere Grind ausgesucht. In de Owwersekunda hab ich mich neewe de Holger gehockt, weil der Gitarreunnerrichd gehat hat. Während de Schulstunn hat er mer die Akkorde uffgezeichend un am Lineal gezeit, wie mer mit de Finger die Saide greift. Deheem hab ich’s dann mit meiner Giddar nohgemacht. Des war sozesaan e extraner Musikunnerricht. Alla, e Virtuos uff de Giddar bin ich net worr.
E Johr schbäder is de Dieter mei Banknachbar gewest. Sei Vadder hat in de Poschdstroß e Radiogeschäft gehat, es Radio Rupp, un de Dieter hat die Proschbekde mit de neije Hits vum Elvis un’m Pat Boone mitgebrung, sodass ich im Fach Rock’n’Roll immer e Enser kriet hab. E besunneres Tandem war ich ah zamme mi’m Helmuth: Der hat direkt hinner mer gesess un hat mer bei de Klassearbeide als uff die Schulder gekloppt. Dann bin ich e Stickelche uff die Seit gerickt, un er hat abschreibe kenne. Ganz umsunschd war die Nohhilf awwer net: Er hat mich brav mit Briefmarke fer mei Sammlung bezahlt.
Es Bärbel war gut in Madde und Physik
In de Owwerprima hab ich e pädagogisches Zweckbindnis geschloss un mich neewes Bärbel gehockt, es ensisch Mäde in de Klass: Es war besunnersch guud in Madde un Physik, ich degeje in de Fremdsprache un in Deitsch. So hammer uns prima ergänzt un ah alle zwee unser Abi geschafft. Ob jetzat des enns vun denne „Phänomene der Homophilie“ gewest is, iwwer des sich des schlaue Fräche vun de Leipzicher Uni de Kopp vebroch hat, weeß ich allerdings net.