Zweibrücker Mundart 
In de Schdadt die Hundehaufe – sinn jo ball zum Hoorausraufe
Bei uns in Zweebricke hann die Hunde kee Lobby. Obwohl bei uns fer iwwer 1600 Hunde Schdeier bezahlt werd un mir e langie Hundetradtion hann: De Herzoch Karl Auguschd hat sich dausend Hundcher gehall, ohne e eensischer Penning Schdeiere se bezahle, weil’s die domols noch net gebb hat. Un de Dietmar Grieser hat eraus gefunn, dass e Schäferhund vum Etzelweesch als Rin Tin Tin Karriere in Hollywood gemacht hat. Soviel zu Zweebricke un seine Hunde.
De Hauptgrund, wesweje die Diercher’s bei uns so schwer hann, sinn die Hundehaufe, in die mer ab un zu enintappt. Mer sollt halt immer e Tiddche debei hann, um des, was die Hunde falle losse, insesammle. Die Schdadt hat desweje Automade uffgeschdellt, aus denne mer so Tiddcher ziehe kann. Awwer es macht halt net jeder devunn Gebrauch.
Annerschwo gebt mer sich meh Mieh. In Malaga hann se e Hunde-DNA-Datei ingerischd, mit der se aus de Hundehaufe die Besitzer feschschdelle un zur Kass bitte kenne. Hoffentlich hann se dodebei ah an de Dadeschutz gedenkt!
Weil heit Fasenachtsdienschdaa is, hab ich mer zu dem Thema e klennie Büdderedd ausgedenkt:
In de Schdadt die Hundehaufe,
sinn jo ball zum Hoorausraufe,
un leije uns ganz schwer im Mache,
des is die reinschd biblisch Plache.
Doch derfsche net zum Himmel bede,
willsche net mim Schlappe nintrete,
sonnern musch uff de Boddem gucke,
ob se dort net heemtückisch hucke.
Musch e Meeschder im Slalom sinn,
sunsch stehsche ah schunn midde drin,
un suchsch se mit de Wünschelrut,
verlosst dich arisch schnell de Mut.
Drum trainiert jetzt die VT
de Hinnernislauf in de Allee,
un die Studente uff de FH
erfinne es Hundehauferadar.
Es Ordnungsamt is schwer empört,
un hat die Haufe zur Chefsach erklärt.
Dann hann se fer e Haufe Geld
fer die Haufe e Haufe Gutachte bestellt.
De erscht Expert meent: schockgefriere
un dann mit Bofrost abtransportiere.
De zwette saat: fort mit de Fäkalie,
am beschde glei nunner bis no Idalie,
un alles in de Vesuv ninkippe
oder bei Capri es Meer vollschippe.
De dritte, der will Hunde un Welpe
no China schicke zu de Gelbe,
die dääde dort die Hunde fresse,
dann kannsche glei die Haufe vegesse.
Es Ordnungsamt mit viel Veschdand
nemmt selbsch die Haufe in die Hand:
Jeder Sauhund muss Bußgeld berappe!
Doch musch ne vorher erschd ertappe.
Denn mer sieht so em Hundeschiss
net an, wer sei Besitzer is.
Drum schließt mer ne an e Lüschedetektor,
bis de Haufe geschdeht,
er is vun Meiers ihrm Hektor.
So krien mir e Ruf als sauberie Stadt,
die e Haufe Schulde
awwer sunsch kee Haufe meh hat.