Zweibrücken Hänn eweg vun unserm scheene Geschdied!

Ledschd Woch hab ich newebei geschribb, dass mer um unser Geschdied Angschd hann muss, alldieweil de Rechnungshof ah desweje de Griffel geschbitzt hat. Dodran hab ich denke misse, wie ich mit meiner Fraa die Perdsdaa besucht hab. Weil’s samschdaas wie aus Kiwwel gegoss hat, ware mer am Sunndaa dort, der jo endlich widder e sunnischer Daa gewest is. Do hat mer mol widder gesiehn, was mir an unserm scheene Geschdied hann. Es is jo schunn was Besunneres, dass die Anlaach mit Reiderhof, Perdeställ un Reithalle midde in de Stadt leit; des gebt’s wohl kaum noch woannerschder. Un net se vegesse: Es geheert zu unsrer Stadtgeschicht, des Geschdied, des de Herzoch Christian de Verde 1755 gegrind hat. Dort hat mer gans beriehmde Rasse gezicht, de Anglo-Araber un ah de Zweebricker, die in gans Europa geritt worr sinn un militärische Karriere gemacht hann. De beriehmdeschde Zweebricker Perdesoldat war em Napoleon sei Reitgaul, de Fayoum, denne mer noh seim Dood 1811 ausgestobbd un im Geschdied ausgestellt hat. Sei kaiserlicher Reider is vier Johr späder im Invalidedom in Paris beerdischd worr. Umgekehrt wär’s e greßeres Schbekdakel gewest. Awwer ich wollt jo iwwer die Perdsdaa vezähle. Alla, mir hann bloß so geschdaunt, wie die Fohle, die grad mol drei Monade ald sinn, newe ihre Studemidder herstolziert sinn. Wemmer des mit uns Mensche im selwe Alde vegleicht! Ei die klenne Gailcheer sinn uff ihre Steckebeencher gedänselt, dass es die reinschd Freed gewest is. Als wäre’s Models bei de Heidi Klum uff’m Laufsteesch. Un dann erschd die Allerklennschde, die Ponnifohle, die ware zum Knuddele. Awwer ah die Mordskerlcher vun Kaldblüder, die net gewisst hann, wohin mit ihrer Kraft, hammer guud gefall. Gefall hätt’s ah meiner Großmudder. Die hat nix vun Perde vestann, war awwer Experdin in Perdsknoddele, un vun denne hat’s nadierlich bei de Fohleparad e Haufe gebb, so uffgereecht, wie die Gailcher ware. Mei Großmudder Friedel hat immer dann, wann die Brauereigail mi’m Bierwaan newean vorm Werdshaus „Zum Storche“ gestann hann, mit de Schipp un mi’m Dreckeemer gewaad, bis es so weit war. Dann hat se die Perdsäppel dabber uffgelees un sich arisch dummle misse, demit rer die Frau Babilon aus de Gärtnerei uff de anner Strooßeseit net sevorkomm is. Des war als es reinschde Wettrenne. Mit denne Perdsäppel sinn dann die Erdbeere in unserm Gaade gedingt worr. Schad, hab ich zu meiner Fraa gesaat, als die Gailcher mol widder was falle geloss hann; schad dass mer net de Oma ihr Schaufel un Dreckeemer debei hann, gell.