Do bische platt Es Jachdrenne war fer uns Lauser frieher de Höhepunkt vum Reenfeschd

Mir drei ware bloß Zaungäschd, mei Fraa, unser Hund Romi un ich, drunne an de Schließ, hann awwer noh enner halwe Stunn uffgebb, weil nix basiert is. Des heeßt, ebbes is doch bassiert: Es hat angefang se reene, wie sich des fer e Reenfeschd gehört. Beim Perderenne muschde halt viel Geduld mitbringe. Am Mondaa druff hab ich dann in de Zeidung geles, dass es mit 3000 Zuschauer widder e voller Erfolsch war. Es sinn jedes Johr 3000 Zuschauer, ganz egal wieviel Leit komme. Wann ich do allerdings an die 50er-Johre denk, wo sich uff alle vier Seite die Mensche dicht an dicht um die Rennwies gedrängelt hann, do misse des domols schticker 100.000 gewest sinn. Awwer egal, Hauptsach es komme genunk, dass sich die Renne lohne. Weil de Perdssport jo e Wahrzeiche vun unsrer Stadt is.

Un des net erschd seit geschder. Schunn 1821 hat’s bei uns Renne gebb, die mit Preise ausgezeichnet ware, domols noch uff’m klenne Exe. 1898 hat de Stadtrat dann beschloss, dass des Perderenne jedes Johr uff de Gestütswiese stattfinne soll, de heidische Rennwies. Im letzte Punkt vun dem Beschluss is dann ah die Zuschauerzahl vebindlich uff 3000 feschdgeleet worr. Noch im selbe Johr is de Pälzische Rennverein unnerm Vorsitz vum Borjemeeschder Wolff gegrind worr; des war zegleich de Anfang vun de Tradition, dass immer es Stadtoberhaupt de Owwerjockey sinn soll. Zu der Tradition hann frieher ah die Steeple-Chase-Renne gehört, die Jachdrenne iwwer Hinnernisse un de Wassergrabe. Wie ich e Lauser war, war des fer uns die Attraktion: Wann de Jockey koppiwwer in de Wassergrabe gesterzt un vesoff is und sei Perd ohne Reider als erschdes dorchs Ziel galoppiert is.

Wilder Weschde im Südweschde

Zwee Woche frieher hat’s im Geschdied e Veanstaldung gebb, die viel se wennisch Beachdung gefunn hat: Es Wesdern-Reide. Do werre vor allem die Quarter Horses (es gebt dodefor kee pälzisches Wort) vorgefiehrt, mit denne frieher die Cowboys die Rindviehscher gehiet hann. Die Gailcher heeße so, weil mer mit denne im Wilde Weschde Korzstreckrenne iwwer e Verdelmeil veanstalt hat. Un do is mer die Idee komm, ob mer net es Perderenne un denne Westerndaa zammeleje kennt! Weil nämlich die Vorführunge mit denne Wild-West-Perde, mit Lasso un Rodeo vor allem fer die Juchend intressant wär.

Ich weeß wovon ich redd, weil ich selbert vor Johre so e Cowboygaul geritt hab, driwwe in Texas; Midnight hat mei Gailche geheeß. Do war ich mit meim Sohn Norman e Woch lang uff enner Dude Ranch, wo mer wie e Cowboy alles mitmache kann, es Vieh treibe un’s Branndzeiche setze, geje die Indianer kämpfe un owens am Lacherfeier T-Bone-Steaks so groß wie e Saddel vedricke un Whiskey drinke. So e Programm uff unsrer Rennwies wär de absoluder Knüller, un es käme vielleicht meh wie 3000 Besucher.