Mundart-Kolumne Do bische platt: Wer will schunn Ameise un Maikäwwer in seiner Brodworschd?

Hanner des geles? Ei do werd doch die Katz hinnerm Owe verickt! De Paul wollt sich gaa nimmie beruhische, wie mer geschder Owend widder beim Bruno zamme an de Thek gehockt hann: Bruno, zapp mer dabber noch e Feierowendschöppche, demit ich mei Ärjer nunnerschlicke kann. Was is dann Furchbares bassiert, Paul, wollt ich wisse, hobb, vezähl. Ei, do hätten se in de Zeidung geschribb, dass jetzat in de EU Insekde als Nahrungsmiddel zugelass worr wäre. Des kann doch net sinn, hat er lamendiert, de Paul, ich will doch kee Maikäwwer un kee Ameise in de Brodworschd hann. Ei mer werd jo grad schlecht, wann ich nur dran denk, was do in Zukunft uff meim Deller rumgrawwelt, fui Deiwel!

Na aller, hat de Bruno gemennt un mit seim Wischlumbe iwwer die Thek gewischt, die Franzose werre uff die Art jo ah ihr Ungeziefer los: Die fresse schunn lang die Schnecke un Grodde, un bei uns mache ne des einische noh, die menne des wär die Haute Cuisine. Ei schlimm genunk, hat de Paul als weider gescholl, awwer jetzat ah noch Werm un Kellerassele im Gulaach, des geht doch se weit, wer hat sich dann des ausgedenkt? Ganz so schrecklich is des ah widder net, hab ich ne beruhische wolle, es geht bloß do drum, dass beschdimmde Insekte zu Mehl veschafft un unner die Nahrung gemischt werre. Des merksch du gaa net, Paul, ob do e bissje Heischreckpulver in deiner Grumbeerupp rumschwimmt. Ei des werd jo immer besser, hat er gekrisch, de Paul, am Enn krawwelt do in meim Schöppche ah schunn e Engerling odder e Dausendfießler rum. Also wann ich des merke dääd, Bruno, wär’s aus un vorbei mit unsrer Freindschaft un ich dääd kee Fuß meh in dei Wertschaft setze.

De Paul war Weltmeeschder im Kaulquappeschlicke

De Bruno hat de Kopp geschiddelt un die Aue vedreht. Do brauchsche kee Angschd se hann, mei Finche halt die Kisch blitzeblank un ich mei Bier sauber, mir stelle sogaa Mausefalle uff. Ich glaab des mit dem Insekdemehl, des kommt vun de Chinese, weil die ihr Milliarde an Leit nimmie satt krien. Un außerdem, hab ich gesaat, muss mer die Lebensmiddel mit Insekdebeilach kennzeichne, do is dann vorne groß e Laus odder e Käwwer druff, demit mer Bescheid weeß. Awwer ebbes ganz anneres Paul: Kannsche dich noch dran erinnere, wie mer als Kinner die Mutprob gemacht hann? E Bali raache, em Nachbar e Scheib inschmeiße un se allerledschd e lewendischie Kaulquapp nunnerschlicke. Im Kaulquappeschlicke warsch du domols de Weltmeeschder un hasch de Rekord gehall: e dutzend Quäppelcher uff enner Schlick. Waad emol, des dauert gaa net lang un du kriesch die Kaulquappe gezuckert odder frittiert beim Aldi.